Vientiane Times Lao
ລາຄາຄໍາທີ່ສູງຈະສົ່ງຜົນກະທົບຕໍ່ຮ້ານຂາຍຄໍາເທົ່ານັ້ນ, ຈະບໍ່ສົ່ງຜົນກະທົບຕໍ່ເສດຖະກິດ

ລາຄາຄໍາທີ່ສູງຈະສົ່ງຜົນກະທົບຕໍ່ຮ້ານຂາຍຄໍາເທົ່ານັ້ນ, ຈະບໍ່ສົ່ງຜົນກະທົບຕໍ່ເສດຖະກິດ

ສະມາຄົມຊາວຄ້າຂາຍອັນຍະມະນີ ແລະ ເຄື່ອງປະດັບລາວ ແຈ້ງໃຫ້ຮູ້ວ່າ: ລາຄາຄໍາຢູ່ລາວ ແລະ ໃນໂລກ ຂຶ້ນສູງເປັນປະຫວັດສາດ ຊຶ່ງລາຄາຄໍາທີ່ສູງນີ້ຈະບໍ່ສົ່ງຜົນກະທົບຕໍ່ເສດຖະກິດຂອງປະເທດລາວ ມີພຽງແຕ່ເຈົ້າຂອງຮ້ານ ຫຼື ຮ້ານຂາຍຄໍາເທົ່ານັ້ນທີ່ໄດ້ຮັບຜົນກະທົບຍ້ອນຍອດການຂາຍຫຼຸດລົງ.

ທ່ານພູວົງ ພະມີສິດ ປະທານ ສະມາຄົມຊາວຄ້າຂາຍອັນຍະມະນີ ແລະ ເຄື່ອງປະດັບລາວ ທັງເປັນປະທານກຸ່ມຄ້າຂາຍຕະຫຼາດເຊົ້າ ໄດ້ກ່າວຕໍ່ທີມງານວຽງຈັນທາຍເມື່ອບໍ່ດົນມານີ້ກ່ຽວກັບລາຄາຄໍາທີ່ຂຶ້ນສູງວ່າ: ລາຄາຄໍາທີ່ເພີ່ມຂຶ້ນສູງນີ້ຍັງບໍ່ເຄີຍມີຈັກເທື່ອ ຄືຢູ່ປະເທດລາວເຮົາ ຂຶ້ນສູງເຖິງ 9.000.000 ກວ່າກີບ/ບາດ, ແຕ່ວ່າລາຄາຄໍາທີ່ສູງຂຶ້ນນີ້ໄດ້ສົ່ງຜົນກະທົບໂດຍກົງຕໍ່ຮ້ານຂາຍຄໍາ ເພາະຈະມີຜູ້ມາຂາຍເຂົ້າຮ້ານ ຫຼາຍກວ່າຜູ້ທີ່ມາຊື້ ຄືປັດຈຸບັນນີ້ຖ້າທຽບກັນແລ້ວລະຫວ່າງຜູ້ທີ່ມາຂາຍ ແລະ ຜູ້ທີ່ມາຊື້ຄໍາ ປະກົດວ່າຜູ້ທີ່ມາຂາຍຈະຫຼາຍກວ່າ. ລາຄາຄໍາທີ່ຂຶ້ນສູງນີ້ມັນຈະຂຶ້ນສູງອີກ ຫຼື ຫຼຸດລົງຍັງບໍ່ມີໃຜປະເມີນໄດ້ ເພາະບາງມື້ມີການຂຶ້ນລົງຮອດ 10 ເທື່ອກໍ່ມີ. ເມື່ອຖາມວ່າລາຄາຄໍາຢູ່ລາວຈະລົງບໍ ແນ່ນອນມັນຕ້ອງລົງ ແຕ່ຈະລົງຮອດ 5 ລ້ານປາຍຄືສິບໍ່ມີແລ້ວ ອາດຈະລົງ ຢູ່ໃນລະດັບ 6-7 ລ້ານປາຍປະມານນັ້ນ.

ທ່ານພູວົງ ໄດ້ກ່າວຕື່ມວ່າ: ລາຄາຄໍາທີ່ສູງຂຶ້ນນີ້ແມ່ນເກີດຈາກຫຼາຍປັດໃຈ ຫຼື ຫຼາຍສາເຫດເຊັ່ນ: ຍ້ອນເກີດສົງຄາມການເມືອງ ແລະ ສົງຄາມດ້ານການຄ້າຂອງບັນດາປະເທດມະຫາອໍານາດໃນໂລກ, ຍ້ອນການລະບາດຂອງພະຍາດໂຄວິດ-19 ທີ່ລະບາດໃນທົ່ວໂລກ, ຍ້ອນການຜັກດັນຍູ້ເສດຖະກິດຂອງແຕ່ລະປະເທດໃນໂລກຫຼັງຈາກທີ່ໄດ້ຮັບຜົນກະທົບຈາກພະຍາດໂຄວິດ-19 ຊຶ່ງແຕ່ລະປະເທດໄດ້ມີການພິມເງິນປະເທດຕົວເອງອອກເປັນຈໍານວນຫຼາຍເພື່ອຍູ້ເສດຖະກິດຂອງປະເທດນັ້ນໆ, ດັ່ງນັ້ນເມື່ອເວລາພິມອອກມາຫຼາຍໄດ້ເຮັດໃຫ້ເງິນເຟີ້ ຈຶ່ງໄດ້ເຮັດໃຫ້ສິນຄ້າທີ່ມີຄວາມໝັ້ນຄົງທີ່ສຸດກໍ່ຄືຄໍາ ມີຄວາມຕ້ອງການຊື້ໄປກັກຕຸນໄວ້ຫຼາຍ.

ຂ່າວ: ວຽງຈັນທາຍ

ພາບ: ສົມພາວັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ