ສ່ວຍສາອາກອນແຂວງອັດຕະປື ຮ່ວມກັບ ພະແນກການທີ່ກ່ຽວຂ້ອງແຂວງອັດຕະປື ໄດ້ຈັດກອງປະຊຸມເຜີຍແຜ່ ,ແນະນຳ ແລະ ເອກະພາບດ້ານວິທີການຈັດຕັ້ງປະຕິບັດການຊໍາລະຄ່າທຳນຽມທາງ ແລະ ການຊໍາລະພາສີທີ່ດິນ ປະຈຳປີ 2021 ເມື່ອວັນທີ 16 ມີນາ 2021 ທີ່ຜ່ານມາ ຢູ່ ພະແນກການເງິນແຂວງ ໂດຍການເປັນປະທານຂອງທ່ານ ຄຳເຜີຍ ໂສມຖາວອນ ຫົວໜ້າພະແນກການເງິນແຂວງອັດຕະປື.
ທ່ານ ສຸລິພອນ ຟອງສະໜຸດ ຮອງຫົວໜ້າສ່ວຍສາອາກອນປະຈໍາແຂວງອັດຕະປື ໄດ້ເຜີຍແຜ່,ແນະນຳແຈ້ງການຂອງທ່ານເຈົ້າແຂວງ ສະບັບເລກທີ 222/ຈຂ.ອປ ແລະ 223/ຈຂ.ອປ, ລົງວັນທີ 15 ກຸມພາ 2021 ກ່ຽວກັບການຊໍາລະຄ່າທໍານຽມທາງ ແລະ ພາສີທີ່ດິນ ປະຈໍາປີ 2021, ທັງນີ້ກໍ່ເພື່ອແນໃສ່ເຮັດໃຫ້ການຈັດຕັ້ງຂັ້ນຕ່າງໆໄດ້ຮັບຮູ້, ເຂົ້າໃຈ ແລະ ມີຄວາມເປັນເອກະພາບໃນການຈັດຕັ້ງປະຕິບັດ ໂດຍເລັ່ງໃສ່ບັນດາອົງການຈັດຕັ້ງລັດ ແລະ ພະນັກງານ-ລັດຖະກອນຕ້ອງເປັນແບບຢ່າງ ໃນການປະກອບສ່ວນ ຊຳລະຄ່າທຳນຽມທາງ ແລະ ພາສີທີ່ດິນຢ່າງຕັ້ງໜ້າ, ຮັບປະກັນໃນການຄຸ້ມຄອງເກັບລາບຮັບໃຫ້ບັນລຸ ຕາມທິດ ທາງແຜນການທີ່ກຳນົດໄວ້ ດ້ວຍການມີສ່ວນຮ່ວມໃນການຊຸກຍູ້,ປິ່ນອ້ອມຈາກ ທຸກພາກສ່ວນທີ່ກ່ຽວຂ້ອງ.
ທ່ານ ທ່ານ ຄຳເຜີຍ ໂສມຖາວອນ ຫົວໜ້າພະແນກການເງິນແຂວງອັດຕະປື ໄດ້ກ່າວໃນກອງປະຊຸມໂດຍມີເນື້ອໃນບາງຕອນທີ່ ສໍາຄັນວ່າ: ການເກັບລາຍຮັບດັ່ງກ່າວຖືວ່າສໍາຄັນຫຼາຍເພື່ອໃຫ້ບັນລຸຕາມແຜນທີ່ວາງໄວ້ ດັ່ງນັ້ນທຸກພາກສ່ວນ ທີ່ມີພາຫະນະທຸກປະເພດ ເປັນຕົ້ນ: ພາຫະນະປ້າຍຟ້າ, ປ້າຍແດງ ປກສ, ປ້າຍແດງກອງທັບ ແລະ ພາຫະນະຂອງພະນັກງານ ຫຼື ກຳລັງພົນ (ປ້າຍເຫຼືອງ ຫຼື ປ້າຍຂາວ) ຕ້ອງໄດ້ໄປເສຍຄ່າທໍານຽມທາງ ຕາມຈຸດຕ່າງໆທີ່ໄດ້ກຳນົດໄວ້ໃຫ້ທ່ວງທັນຕາມກຳນົດເວລາ ແລະ ຖືກຕ້ອງຕາມລະບຽບກົດໝາຍ.
ການຊຳລະຄ່າທຳນຽມທາງ ປະຈຳປີ 2021 ຈະໝົດເວລາຊໍາລະໃນວັນທີ 31 ມີນາ 2021 ນີ້ ແລະ ການຊຳລະພາສີທີ່ດິນ ກໍ່ມີຄາດໝາຍໃຫ້ສຳເລັດກ່ອນວັນທີ 30 ມິຖຸນາ 2021 ນີ້.
ຂ່າວ: ວັດທະນາ ຂ.ອັດຕະປື
