ເນື່ອງໃນໂອກາດທີ່ ທ່ານ ເລັດ ໄຊຍະພອນ ກໍາມະການສູນກາງພັກ, ເລຂາພັກແຂວງ ເຈົ້າແຂວງອັດຕະປື ແລະ ຄະນະໄດ້ລົງເຄື່ອນໄຫວວຽກງານຢູ່ເມືອງພູວົງ ແຂວງອັດຕະປື ເມື່ອບໍ່ດົນມານີ້, ທ່ານໄດ້ເນັ້ນໃຫ້ຄະນະນໍາ ເມືອງພູວົງ ສືບຕໍ່ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຂອງເມືອງຕົນ, ໂດຍສະເພາະການຊີ້ນໍາ-ນໍາພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ເກີດຜົນເປັນຈິງ, ຜັນຂະຫຍາຍເປັນແຜນວຽກລະອຽດ ໃຫ້ທຸກຂະແໜງການຂອງເມືອງສົມທົບກັບພາກສ່ວນກ່ຽວຂ້ອງຂອງແຂວງ, ນໍາເອົາແຜນວຽກລົງໄປຈັດຕັ້ງປະຕິບັດຢູ່ບ້ານ ແລະ ຕິດພັນກັບ ການຕິດຕາມກວດກາ-ປະເມີນຜົນ ແລະ ແກ້ໄຂຈຸດອອ່ນ ຂໍ້ຄົງຄ້າງ ຕາມຈຸດພິເສດຂອງແຕ່ລະຂົງເຂດ.
ພ້ອມດຽວກັນນັ້ນ, ທ່ານເຈົ້າແຂວງຍັງໄດ້ເນັ້ນໃຫ້ການນໍາເມືອງເອົາໃຈໃສ່ຊຸກຍູ້ສົ່ງເສີມກຸ່ມການຜະລິດ ກະສິກໍາ ເປັນຕົ້ນ: ປູກອ້ອຍ, ມັນຕົ້ນ, ພືດຜັກຊະນິດຕ່າງໆ ເພື່ອສະໜອງປ້ອນໂຮງງານ ແລະ ຕະຫຼາດ, ສົ່ງເສີມຫັດຖະກໍາ, ອຸດສາຫະກໍາ ໃຫ້ຫຼາຍຂຶ້ນ ແລະ ສົ່ງເສີມການຜະລິດກະສິກໍາໃຫ້ ກາຍເປັນສິນຄ້າ ແລະ ອື່ນໆ.
ຂ່າວ-ພາບ: ໂບ້
