ນະຄອນປາກເຊ ອາດຈະປຽ່ນຊື່ມາເປັນ ນະຄອນຄຳໄຕ ສີພັນດອນ

ຄະນະຈັດຕັ້ງສູນກາງພັກ ກຽມຄົ້ນຄວ້າປ່ຽນຊື່ນະຄອນປາກເຊ ແຂວງຈໍາປາສັກ ປ່ຽນຊື່ມາເປັນນະຄອນ ຄຳໄຕ ສີພັນດອນ.

ເພື່ອເຮັດໃຫ້ການປ່ຽນຊື່ນະຄອນ ດໍາເນີນໄປຢ່າງຖຶກຕ້ອງຕາມກົດຫມາຍ ແລະ ສອດຄ່ອງກັບນິຕິກໍາທີ່ ກ່ຽວຂ້ອງ, ຄະນະຈັດຕັ້ງສູນກາງພັກ ຂໍຖືເປັນກຽດແຈ້ງມາຍັງ ສະຫາຍ ເລຂາຄະນະພັກ, ປະທານຄະນະກໍາມະການ ປົກຄອງແຂວງຈໍາປາສັກ ໃຫ້ປະຕິບັດຕາມຂັ້ນຕອນ ດັ່ງລຸ່ມນີ້:

1. ປະທານຄະນະກໍາມະການປົກຄອງແຂວງຈໍາປາສັກ ອອກຂໍ້ຕົກລົງແຕ່ງຕັ້ງຄະນະຮັບຜິດຊອບ ເພື່ອກະກຽມ ຮອບດ້ານໃນການປ່ຽນຊື່ ນະຄອນປາກເຊ ເປັນ ນະຄອນ ຄໍາໄຕ ສີພັນດອນ.

2. ກະກຽມເອກະສານ ແລະ ຂໍ້ມູນຕ່າງໆ ທີ່ຈໍາເປັນເພື່ອຮ່າງບົດວິພາກໃນການປ່ຽນຊື່ນະຄອນ.

3. ປະທານຄະນະກໍາມະການປົກຄອງແຂວງຈໍາປາສັກ ສະເໜີການປ່ຽນຊື່ນະຄອນ ຕໍ່ສະພາປະຊາຊົນແຂວງ ຈໍາປາສັກ ເພື່ອພິຈາລະນາຮັບຮອງ.

4. ພາຍຫຼັງສະພາປະຊາຊົນແຂວງຈໍາປາສັກ ຮັບຮອງແລ້ວ, ປະທານຄະນະກໍາມະການປົກຄອງແຂວງຈໍາປາສັກ ສະເໜີການປ່ຽນຊື່ນະຄອນ ຫາລັດຖະບານ ໂດຍຜ່ານຄະນະຈັດຕັ້ງສູນກາງພັກ ເພື່ອພິຈາລະນາ.