ບໍລິສັດພຣູເດັນໂຊລ໌ ປະກັນໄພຊີວິດ ຮ່ວມມືກັບ ບໍລິສັດສະຕາຟິນເທັກ ກ່ຽວກັບການໃຫ້ບໍລິການຊຳລະຄ່າທຳນຽມປະກັນໄພ ຜ່ານລະບົບ ຢູ່ມັນນີ ຊຶ່ງເປັນການພັດທະນາຊ່ອງທາງການຊຳລະເງິນຮູບແບບໃໝ່ ໂດຍສະເພາະການຈ່າຍຄ່າທຳນຽມປະກັນໄພຊີວິດ, ເປັນການເສີມຂະຫຍາຍຄຸນນະພາບການໃຫ້ບໍລິການ ແລະ ເພື່ອອຳນວຍຄວາມສະດວກສະບາຍໃຫ້ແກ່ລູກຄ້າທັງສອງຝ່າຍ.
ພິທີເຊັນສັນຍາໃນການຮ່ວມມືດັ່ງກ່າວໄດ້ຈັດຂຶ້ນເມື່ອວັນທີ 30 ທັນວາ 2020 ທີ່ຜ່ານມາ ທີ່ ບໍລິສັດສະຕາຟິນເທັກ ນະຄອນຫຼວງວຽງຈັນ, ຕາງໜ້າລົງນາມ ໂດຍ ທ່ານ ເຄນຢ້ອນ ໂຮ ຜູ້ອຳນວຍການຝ່າຍບໍລິຫານການຄ້າ, ບໍລິສັດ ພຣູເດັນໂຊລ໌ ປະກັນໄພຊີວິດ (ລາວ) ຈຳກັດ ແລະ ທ່ານ ເຈີນ ມີງ ດຶກ ຮອງຜູ້ອໍານວຍການ ບໍລິສັດ ສະຕາຟິນເທັກ ຈໍາກັດຜູ້ດຽວ, ໂດຍມີ ທ່ານ ນາງສຸທານີ ສີສຸວົງ ຮອງຫົວໜ້າພະແນກກວດກາລະບົບຊຳລະ ຕາງໜ້າ ຄຸ້ມຄອງລະບົບຊຳລະສະສາງ ທະນາຄານແຫ່ງ ສປປ ລາວ ແລະ ພະນັກງານຂອງສອງບໍລິສັດເຂົ້າຮ່ວມເປັນສັກຂີພິຍານ.
ຂ່າວ-ພາບ: ຕ້ອມ ນັກຂ່າວສັນຈອນວຽງຈັນທາຍ
