ບໍລິສັດຮ່ວມທຶນພັດທະນາ ທາງດ່ວນ ລາວ-ຈີນ ໄດ້ພົບປະ ກັບຕົວແທນສື່ມວນຊົນລາວຈາກ 16 ສຳນັກງານ ເມື່ອວັນທີ 8 ເມສາ 2021ທີ່ຜ່ານມາເພື່ອຊອກຫາຊ່ອງທາງການຮ່ວມ ມື ໂຄສະນາ ແລະ ສະໜອງຂໍ້ມູນທີ່ຖືກຕ້ອງໃຫ້ແກ່ສັງຄົມ.
ບໍລິສັດດັ່ງກ່າວ ເປັນຜູ້ພັດທະນາ ແລະ ບໍລິການ ທາງດ່ວນວຽງຈັນ ຫາ ວັງວຽງ ເຊິ່ງມີຄວາມຍາວປະມານ 111 ກິໂລແມັດ. ໂຄງການດັ່ງກ່າວໄດ້ເປີດນຳໃຊ້ຢ່າງເປັນທາງການ ໃນວັນທີ 20 ເດືອນ ທັນວາ ປີ 2020.
ທ່ານມາຫົງຫວາງ ຮອງປະທານ ບໍລິສັດ ຮ່ວມທຶນ ພັດທະນາ ທາງດ່ວນ ລາວ-ຈີນ ໄດ້ຍົກຫຼາຍບັນຫາທີ່ພົວພັນເຖິງການຄຸ້ມຄອງ ແລະ ບໍລິການທາງດ່ວນ ລວມໄປເຖິງການແກ້ໄຂບັນຫາຕ່າງໆ ເພື່ອມາປຶກສາຫາລືກັບສື່ມວນຊົນ ເຊັ່ນ: ບັນຫາການລັກສາຍໄຟ, ທຳລາຍຮົ້ວຕາມເສັ້ນທາງດ່ວນ, ສັດລ້ຽງຂອງປະຊາຊົນ ຂື້ນມາທາງດ່ວນ, ອຸປະຕິເຫດ ແລະ ການລາຍງານຂ່າວສື່ອອນລາຍ ບໍ່ຖືກຕ້ອງຕາມຄວາມຈິງ ແລະ ອອກຂ່າວໃນຮູບແບບໃສ່ຮ້າຍປ້າຍສີທາງດ່ວນ. ທ່ານມາຫົງຫວາງ ລາຍງານຕື່ມວ່າ: ບໍລິສັດໄດ້ປະສານງານກັບຕຳຫຼວດຈະລາຈອນທີ່ຖືກແຕ່ງຕັ້ງມາປະຈຳຢູ່ທາງດ່ວນ ແລະ ນາຍບ້ານ ໂດຍສະເພາະແມ່ນບ້ານທີ່ຢູ່ລຽບຕາມເສັ້ນທາງດ່ວນ ເພື່ອໂຄສະນາ ໃຫ້ປະຊາຊົນ ເຂົ້າໃຈກ່ຽວກັບສາເຫດ ຂອງອຸປະຕິເຫດ.
ບໍລິສັດໄດ້ຕິດຕາມຄຳຄິດຄຳເຫັນ ຂອງປະຊາຊົນ ກ່ຽວກັບທາງດ່ວນ ຢູ່ເຟສບຸກ.
ບາງຄົນກໍ່ຍົກຂື້ນວ່າ ອຸໂມງບາງຈຸດມືດຫຼາຍ ຕໍ່ກັບບັນຫານີ້ ທ່ານມາຫົງຫວາງ ໄດ້ອະທິບາຍວ່າ: ສາຍເຫດ ຂອງອຸໂມງມືດຍ້ອນມີຄົນລັກສາຍໄຟຟ້າ, ບໍລິສັດກໍ່ໄດ້ມີຄວາມພະຍາຍາມສ້ອມແປງຄືນຫຼາຍຄັ້ງແຕ່ກໍ່ຍັງມີຄົນມາລັກອີກ.
ໂຄງການທາງດ່ວນວຽງຈັນຫາ ວັງວຽງ ເປັນເສັ້ນທາງດ່ວນທຳອິດ ຂອງ ສປປ ລາວ ແລະ ກໍ່ແມ່ນໂຄງການຍຸດທະສາດ ທີ່ສຳຄັນ ໃນການເຊື່ອມໂຍງ ລະຫວ່າງ ຍຸດທະສາດການຫັນປະເທດ ອອກຈາກປະເທດ ທີ່ບໍ່ມີຊາຍແດນຕິດຈອດກັບທະເລ ກາຍເປັນປະເທດເຊື່ອມໂຍງ ແລະ ຂໍ້ລິເລີ່ມ ໜຶ່ງເສັ້ນທາງ ໜຶ່ງແລວທາງ ຂອງ ສປ ຈີນ.
ຫລັງຈາກເປີດນຳໃຊ້ຢ່າງເປັນທາງການແລ້ວທາງດ່ວນວຽງຈັນ ຫາ ວັງວຽງ ໄດ້ປະກອບສ່ວນຊຸກຍູ້ທຸລະກິດ ແລະ ການບໍລິການ ຢູ່ເມືອງ ວັງວຽງໃຫ້ມີຊີວິດຊີວາຂື້ນ ຫຼັງຈາກ ບັນດາຫົວໜ່ວຍທຸ ລະກິດ ເຫຼົ່ານີ້ຖືກກະທົບ ຈາກພະຍາດໂຄວິດ-19 ແລະ ໄດ້ອຳນວຍຄວາມສະດວກໃນການເດີນທາງ.
ໄລຍະເວລາເດີນທາງຈາກນະຄອນຫຼວງວຽງຈັນ ຫາ ເມືອງ ວັງວຽງ ຫຼຸດລົງຈາກ 3ຊົ່ວໂມງ ມາເປັນ 1ຊົ່ວໂມງ ກັບ 20 ນາທີ ດ້ວຍຄວາມໄວຈຳກັດ 120 ກິໂລແມັດຕໍ່ຊົ່ວໂມງ.
ທາງດ່ວນແມ່ນມີຄວາມໄວຂອງການສັນຈອນຂອງພາຫະນະ. ດັ່ງນັ້ນ, ອຸປະຕິເຫດຈຶ່ງເກີດຂື້ນຫຼາຍຄັ້ງ ຍ້ອນຄວາມປະໝາດຂອງນັກຂັບຂີ່ ເຮັດໃຫ້ມີຄົນເສຍຊິວິດ ແລະ ຊັບສິນ.
ທ່ານມາຫົງຫວາງ ໄດ້ຍົກໃຫ້ເຫັນສາຍເຫດຫຼັກໆຂອງປຸຕິເຫດມີຄືດັ່ງນີ້: ຍ້ອນຜູ້ຂັບຂີ່ຂັບເກີນ ຄວາມໄວຈຳກັດຫຼາຍ, ເມົາແລ້ວຂັບ, ຂັບລົດໃນຄະນະທີ່ຮ່າງກາຍອິດ ອອ່ນເພຍ ແລະ ເໝື່ອຍ ແລະ ອື່ນໆ…
ນອກຈາກພັດທະນາ ແລະ ກໍ່ສ້າງ ທາງດ່ວນຈາກວຽງຈັນຈາກ ຫາ ວັງວຽງ ແລ້ວ ບໍລິສັດຮ່ວມທຶນ ພັດທະນາທາງດ່ວນ ລາວ-ຈີນ ຍັງຈະສືບຕໍ່ພັດທະນາ ທາງດ່ວນຊວງ ອື່ນໆອີກ ຕໍ່ຈາກ ວັງວຽງ ເຊັ່ນ: ວັງວຽງ ເຖິງ ບໍເຕັນ ຢູ່ແຂວງ ຫຼວງນ້ຳທາເຊິງມີຕິດສາຍແດນກັບ ແຂວງ ຢູນນານ ສປ ຈີນ.
ຂ່າວ-ພາບ: ມະນີຈັນ
