ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະທານປະເທດ ແຫ່ງ ສປປ ລາວໄດ້ສະເໜີຮ່າງລາຍງານການເມືອງ ຂອງກອງປະຊຸມໃຫຍ່ ຄັ້ງທີ XII ຂອງພັກ ຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ປະຊາຊົນປະຕິວັດລາວ ໃນມື້ເຊົ້ານີ້ກ່ຽວກັບການສືບຕໍ່ຍູ້ແຮງພາລະກິດການປ່ຽນແປງໃໝ່ຂອງພັກ,ນໍາພາບູລະນະລະບອບປະຊາທິປະໄຕປະຊາຊົນ ໃຫ້ໜັກແໜ້ນກ້າວຂຶ້ນສູ່ສັງຄົມນິຍົມວ່າ: ໃນຊຸມປີຕໍ່ໜ້າ, ສະພາບການພາກພື້ນ ແລະສາກົນ ຍັງຈະສັບສົນ, ສະຫຼັບສັບຊ້ອນ ແລະ ສືບຕໍ່ຜັນແປຢ່າງໄວວາ, ເກີດມີສິ່ງທ້າທາຍໃໝ່ ທີ່ຄາດຄະເນໄດ້ຍາກ. ເຖິງແນວໃດກໍຕາມ ບັນຫາສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ, ການປົກປັກຮັກສາສິ່ງແວດລ້ອມ ຍັງເປັນທ່າອ່ຽງລວມ, ເປັນຄວາມສະແຫວງຫາ ຂອງມວນມະນຸດ.
ປະເທດເຮົາ, ເຖິງຈະມີກາລະໂອກາດທີ່ເອື້ອອຳນວຍໃນຫຼາຍດ້ານ,ແຕ່ກໍ່ຍັງຈະສືບຕໍ່ປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ… ເຖິງຢ່າງໃດກໍຕາມ, ດ້ວຍມູນເຊື້ອອົງອາດກ້າແກ່ນ, ພັກເຮົາຕັດສິນໃຈສືບຕໍ່ນຳພາຍູ້ແຮງພາລະກິດການປ່ຽນແປງໃໝ່, ຕອບສະໜອງຄວາມມຸ່ງມາດປາຖະໜາອັນແຮງກ້າ ຂອງປະຊາຊົນບັນດາເຜົ່າທີ່ຢາກຍົກລະດັບຊີວິດການເປັນຢູ່ໃຫ້ດີຂຶ້ນ, ນຳພາປະເທດຊາດ ກ້າວຂຶ້ນສູ່ສັງຄົມນິຍົມ.
ບົນພື້ນຖານດັ່ງກ່າວ,ໃນຊຸມປີຕໍ່ໜ້ານີ້ ພັກເຮົາ ສືບຕໍ່ວາງທິດທາງ, ໜ້າທີ່ຕົ້ນຕໍ ໃນການສືບຕໍ່ນຳພາພາລະກິດປະຕິວັດ ຢູ່ປະເທດເຮົາຕາມຄໍາຂວັນລວມ ທີ່ວ່າ: “ຍົກສູງບົດບາດການນຳພາທີ່ເຂັ້ມແຂງຂອງພັກ, ຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງ, ສືບຕໍ່ບູລະນະລະບອບປະຊາທິປະໄຕປະຊາຊົນໃຫ້ໜັກແໜ້ນ ກ້າວຂຶ້ນສູ່ສັງຄົມນິຍົມ”ດັ່ງນີ້:
1. ທິດທາງ, ໜ້າທີ່ຕົ້ນຕໍ ໃນຕໍ່ໜ້າ
1)ຮອດປີ 2055:ຕ້ອງເພີ່ມທະວີມານະຈິດປະຕິວັດ ຂອງທົ່ວພັກ, ທົ່ວປວງຊົນ, ເສີມຂະຫຍາຍກໍາລັງແຮງສັງລວມພາຍໃນຊາດ ແລະ ສົມທົບກັບກໍາລັງແຮງຂອງຍຸກສະໄໝ ເພື່ອສູ້ຊົນພັດທະນາສປປ ລາວ ເປັນປະເທດກຳລັງພັດທະນາ, ມີລາຍຮັບປານກາງສູງ ຍັບເຂົ້າໃກ້ປະເທດທີ່ມີລາຍຮັບສູງ.
2) ໄລຍະແຕ່ປີ 2026 ເຖິງ 2035:
ສືບຕໍ່ດໍາເນີນການສ້າງ, ປັບປຸງ ແລະ ຍົກລະດັບບັນດາປະຖົມປັດໄຈຕົ້ນຕໍ ໃຫ້ແກ່ການບູລະນະລະບອບປະຊາທິປະໄຕປະຊາຊົນ ໃຫ້ໜັກແໜ້ນ, ຍົກສູງຄວາມເປັນເຈົ້າຕົນເອງສືບຕໍ່ສ້າງພື້ນຖານໃນການພັດທະນາ;ຮັບປະກັນສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ຍຸຕິທໍາ; ອົງການລັດ ປະຕິບັດພາລະບົດບາດ,ໜ້າທີ່ ຕາມກົດໝາຍຢ່າງເຂັ້ມແຂງ,ມີປະສິດທິພາບ,ຍົກສູງຄວາມສາມາດໃນການຄຸ້ມຄອງມະຫາພາກ ຂອງສູນກາງ ແລະ ຄວາມເປັນເຈົ້າການຂອງທ້ອງຖິ່ນ;ການພັດທະນາເສດຖະກິດ-ສັງຄົມ ມີຈຸດສຸມ, ມີຄຸນະພາບ, ໜັກແໜ້ນ ຕາມທິດສີຂຽວ ແລະ ຍືນຍົງ, ເສດຖະກິດມະຫາພາກ ມີສະຖຽນລະພາບ, ຄວບຄຸມເງິນເຟີ້, ຫຼຸດຜ່ອນພາລະໜີ້ສິນສາທາລະນະ, ລັດວິສາຫະກິດ ເປັນກໍາລັງແຮງຮ່ວມກັບພາກສ່ວນເສດຖະກິດອື່ນໆໃນພື້ນຖານເສດຖະກິດແຫ່ງຊາດ;ພັດທະນາແຫຼ່ງຊັບພະຍາກອນມະນຸດທີ່ມີຄວາມສາມາດໃຫ້ແກ່ການພັດທະນາເພີ່ມຂຶ້ນ, ຍົກສູງຄຸນະພາບຊີວິດ ຂອງປະຊາຊົນ; ຍູ້ແຮງການນໍາໃຊ້ວິທະຍາສາດ-ເຕັກໂນໂລຊີ ແລະ ການຫັນເປັນດິຈິຕອນໃນຂົງເຂດຕ່າງໆ; ການພັດທະນາ ມີຄວາມກົມກຽວ,ສົມດຸນ, ຫຼຸດຜ່ອນຄວາມສ່ຽງຈາກໄພທຳມະຊາດ ແລະ ຮັບມືກັບການປ່ຽນແປງຂອງດິນຟ້າອາກາດ ຢ່າງມີປະສິດທິຜົນ;ການເຊື່ອມໂຍງ-ເຊື່ອມຈອດ ກັບປະເທດໃກ້ຄຽງ, ພາກພື້ນ ແລະ ສາກົນ ໄດ້ຮັບການຈັດຕັ້ງປະຕິບັດເປັນຮູບປະທໍາເປັນກ້າວໆ.
3)ໃນ 5 ປີຕໍ່ໜ້າ (2026-2030):
ສືບຕໍ່ຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ,ສັງຄົມມີຄວາມສະຫງົບ, ມີຄວາມສາມັກຄີເປັນປຶກແຜ່ນໃນທົ່ວປວງຊົນ, ເອກະລາດ, ອໍານາດອະທິປະໄຕ ໄດ້ຮັບການປົກປັກຮັກສາໄວ້ໄດ້ຢ່າງໝັ້ນຄົງ;ປະເທດຊາດ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ;ລະບົບການເມືອງ ໄດ້ຮັບການປັບປຸງໃຫ້ປອດໃສ, ເຂັ້ມແຂງ, ໜັກແໜ້ນ; ສູ້ຊົນເຮັດໃຫ້ຄວາມຫຍຸ້ງຍາກດ້ານເສດຖະກິດ-ການເງິນ ໄດ້ຮັບການແກ້ໄຂຢ່າງເລິກເຊິ່ງ, ບໍ່ສ້າງໜີ້ສິນໜັກໜ່ວງ; ພັດທະນາເສດຖະກິດໃຫ້ມີຄວາມເຂັ້ມແຂງ, ເປັນເຈົ້າຕົນເອງ, ສຸມໃສ່ 7 ຂະແໜງເສດຖະກິດປາຍແຫຼມ,ການຄຸ້ມຄອງ-ບໍລິຫານເສດຖະກິດ ດໍາເນີນໄປຖືກຕ້ອງຕາມກົດໝາຍ; ການພັດທະນາຂະຫຍາຍຕົວໄວ, ຕໍ່ເນື່ອງ, ສູ້ຊົນໃຫ້ອັດຕາການເຕີບໂຕ ຂອງລວມຍອດຜະລິດຕະພັນພາຍໃນ (GDP) ໃຫ້ເພີ່ມຂຶ້ນສະເລ່ຍ6% ຕໍ່ປີຂຶ້ນໄປ; ຄຸນນະພາບຊີວິດຂອງປະຊາຊົນໄດ້ຮັບການຍົກສູງຂຶ້ນ; ວັດທະນະທໍາອັນດີງາມ ແລະ ເປັນເອກະລັກ ຂອງຊາດໄດ້ຮັບການເສີມຂະຫຍາຍ, ຊັບພະຍາກອນມະນຸດ ໄດ້ຮັບການກໍ່ສ້າງ ແລະ ພັດທະນາຢ່າງມີຈຸດສຸມ ແລະ ມີຄຸນະພາບ; ສປປ ລາວ ເຄື່ອນໄຫວການຕ່າງປະເທດຢ່າງເປັນເຈົ້າການ, ໄດ້ຮັບຄວາມເຊື່ອໝັ້ນຈາກເພື່ອນມິດສາກົນ ແລະ ສືບຕໍ່ເຮັດໃຫ້ ສປປ ລາວ ມີບົດບາດ ພົ້ນເດັ່ນຂຶ້ນ.
ເພື່ອເຮັດໃຫ້ທິດທາງ ແຕ່ນີ້ຮອດປີ 2030 ໄດ້ຮັບການຈັດຕັ້ງປະຕິບັດໃຫ້ເປັນຮູບປະທໍາ, ພວກເຮົາ ຕ້ອງສືບຕໍ່ບຸກທະລຸທັງສີ່ດ້ານ ໃຫ້ແຂງແຮງ, ເລິກເຊິ່ງ ແລະ ເປັນຮູບປະທຳ ໂດຍສືບຕໍ່ເຊື່ອມສານ ແລະ ຜັນຂະຫຍາຍ-ຕໍ່ຍອດ ວຽກງານຈຸດສຸມ ໃນວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (2022-2025) ໃຫ້ນຳເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີXໃຫ້ກາຍເປັນແຜນປົກກະຕິ ເພື່ອຊີ້ນໍາການຈັດຕັ້ງປະຕິບັດ ໃຫ້ເຂົ້າສູ່ລວງເລິກ, ມີປະສິດທິຜົນ ແລະ ໃຫ້ຂາດຕົວໃນບາງດ້ານ ດ້ວຍມາດຕະການສຳຄັນ, ເລັ່ງດ່ວນ ຈຳນວນໜຶ່ງ ດັ່ງນີ້:
3.1ປະຕິຮູບລະບອບ-ລະບຽບການຕ່າງໆ ໃຫ້ໂປ່ງໃສ, ຫຼຸດຜ່ອນຂອດຂັ້ນ ແລະ ຍົກສູງປະສິດທິພາບ ແລະ ຄວາມສາມາດ ໃນການບໍລິຫານປະເທດ ຕິດພັນກັບການຊຸກຍູ້ການຫັນທັນສະໄໝ-ຫັນເປັນດີຈິຕອນ, ການແບ່ງຂັ້ນຄຸ້ມຄອງ, ແບ່ງສິດໃຫ້ຈະແຈ້ງ, ຂາດຕົວ ແລະ ສ້າງສະພາບແວດລ້ອມການລົງທຶນ, ການດໍາເນີນການຜະລິດ-ທຸລະກິດ ໃຫ້ມີຄວາມສະດວກ, ວ່ອງໄວ ແລະ ມີຄວາມສາມາດສູງຂຶ້ນ ໃນການແຂ່ງຂັນ;
3.2 ປຸກລະດົມ ແລະ ຍູ້ແຮງຂະບວນການພັດທະນາປະເທດຊາດ ຂຶ້ນສູ່ລະດັບສູງ,ຍົກສູງຈິດໃຈເອກະລາດ, ຄວາມເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ບຸກບືນສູ້ຊົນ ເຮັດໃຫ້ປະຊາຊົນຮູ້ທຳມາຫາກິນແບບໃໝ່, ມີວິຖີຊີວິດແບບໃໝ່ກ້າວຂຶ້ນ ແລະ ສ້າງໃຫ້ວິສາຫະກິດຂອງລັດ ແລະ ເອກະຊົນເຂັ້ມແຂງ, ຮັ່ງມີຂຶ້ນ; ນຳພາຊຸກຍູ້ການປະຕິບັດແນວທາງການກໍ່ສ້າງເສດຖະກິດເອກະລາດ ເປັນເຈົ້າຕົນເອງ ຢ່າງແຂງແຮງ, ສ້າງທ່ວງທ່າການພັດທະນາທີ່ຍືນຍົງ ແລະ ເຊື່ອມໂຍງກັບສາກົນ; ຫັນປ່ຽນຈາກສັງຄົມຊົມໃຊ້ໄປສູ່ສັງຄົມແຫ່ງການຜະລິດໃຫ້ໄດ້ເປັນຮູບປະທຳ;
3.3 ປ່ຽນແປງໃໝ່ຢ່າງຮອບດ້ານ ວຽກງານຄຸ້ມຄອງ ແນໃສ່ຍົກສູງປະສິດທິຜົນການຂຸດຄົ້ນ ແລະ ນໍາໃຊ້ແຫຼ່ງຊັບພະຍາກອນທຳມະຊາດເປັນຕົ້ນແມ່ນ ໃນຂົງເຂດບໍ່ແຮ່, ຊັບພະຍາກອນນ້ຳ,ທີ່ດິນ ໃຫ້ກາຍເປັນການຜະລິດທີ່ຍືນຍົງ; ຕັ້ງໜ້າຜະລິດພະລັງງານໄຟຟ້າດ້ວຍຫຼາຍທາງເລືອກ ລວມທັງພະລັງງານນ້ຳ, ແສງຕາເວັນ, ລົມ ແລະ ພະລັງງານນິວເຄຼຍ ເພື່ອຊົມໃຊ້ພາຍໃນ ແລະ ເພື່ອການສົ່ງອອກ; ເພີ່ມທະວີການບໍລິຫານທີ່ດີ, ສ້າງຄວາມໂປ່ງໃສ, ຕ້ານ ແລະ ສະກັດກັ້ນ ການສໍ້ລາດບັງຫຼວງ,ອັດຊ່ອງວ່າງການຮົ່ວໄຫຼ, ເພີ່ມແຫຼ່ງລາຍຮັບງົບປະມານ ເພື່ອສ້າງກໍາລັງແຮງ ໃຫ້ແກ່ການຊຸກຍູ້ການພັດທະນາ ເສດຖະກິດ-ສັງຄົມ ໃຫ້ໄວຂຶ້ນ, ໝັ້ນທ່ຽງ ແລະ ມີຄວາມຍືນຍົງ.
ບົນຈິດໃຈເນື້ອໃນໃຫຍ່ທີ່ກໍານົດອອກໃນທິດທາງ,ໜ້າທີ່ຕົ້ນຕໍຂ້າງເທິງນັ້ນ, ພວກເຮົາ ຕ້ອງເອົາໃຈໃສ່ວຽກງານຈຸດສຸມ ແຕ່ລະຂົງເຂດ ດັ່ງນີ້:
1.ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ, ຮັບປະກັນສະຖຽນລະພາບດ້ານການເມືອງ ແລະຄວາມສະຫງົບສຸກຂອງສັງຄົມ.ເພີ່ມທະວີຄວາມສາມາດນໍາພາເດັດຂາດ, ໂດຍກົງ, ຮອບດ້ານຂອງພັກ ຕໍ່ກໍາລັງປ້ອງກັນຊາດ-ປ້ອງກັນຄວາມສະຫງົບ; ສ້າງກຳລັງໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນ ຕາມທິດຫັນເປັນເປັນມືອາຊີບ ແລະ ທັນສະໄໝ, ເປັນກຳລັງທີ່ຊື່ສັດ, ຈົງຮັກພັກດີຢ່າງເດັດຂາດຕໍ່ພັກ, ຕໍ່ປະເທດຊາດ, ຕໍ່ປະຊາຊົນ, ກຽມພ້ອມຮັບມືກັບທຸກສະຖານະການ. ສືບຕໍ່ເປັນຫຼັກແຫຼ່ງແກ່ນສານໃນການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕິດພັນກັບການສະກັດກັ້ນ, ປ້ອງກັນ ແລະ ແກ້ໄຂບັນຫາອາຊະຍາກໍາທາງໄຊເບີ ຕິດພັນກັບບັນຫາອາຊະຍາກໍາຕ່າງໆ…
2. ສືບຕໍ່ສ້າງເສດຖະກິດເອກະລາດ, ເປັນເຈົ້າຕົນເອງ ແລະ ເຊື່ອມໂຍງກັບພາກພື້ນ ແລະ ສາກົນ ໃຫ້ເຂັ້ມແຂງ, ນຳພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາ ຢ່າງໂລ່ງລ່ຽນ ແລະ ຍືນຍົງ.
-ເພີ່ມທະວີການນຳພາພັດທະນາເສດຖະກິດຕະຫຼາດຕາມທິດສັງຄົມນິຍົມ ໂດຍເລີ່ມຈາກການສ້າງເສດຖະກິດເອກະລາດ ເປັນເຈົ້າຕົນເອງ ຕາມມະຕິ 04/ກມສພ, ລົງວັນທີ 04 ເມສາ 2024 ແລະ ເຊື່ອມໂຍງກັບພາກພື້ນ ແລະ ສາກົນ ໃຫ້ກ້າວສູ່ລວງເລິກ ແລະ ເຂັ້ມແຂງ.
– ປັບປຸງແລະສ້າງພາກສ່ວນເສດຖະກິດລັດ ໃຫ້ສາມາດເປັນເຈົ້າພາທາງໃນພື້ນຖານເສດຖະກິດແຫ່ງຊາດ;ຮີບຮ້ອນສ້າງຕັ້ງ ແລະປັບປຸງ ລັດວິສາຫະກິດຈຳນວນໜຶ່ງທີ່ຈໍາເປັນ;ສົ່ງເສີມບັນດາພາກສ່ວນເສດຖະກິດອື່ນໆຢ່າງແຂງແຮງ, ຖືພາກສ່ວນເສດຖະກິດຕ່າງໆເປັນກໍາລັງແຮງ ຂອງພື້ນຖານເສດຖະກິດແຫ່ງຊາດ.
– ປັບປຸງໂຄງປະກອບຂະແໜງເສດຖະກິດ ນັບມື້ຈະແຈ້ງຂຶ້ນ, ກວດກາ ແລະ ກຳນົດຄືນ ຍຸດທະສາດພັດທະນາຂອງບັນດາຂະແໜງການຜະລິດ ແລະ ບໍລິການ ດ້ວຍການສົມທົບແໜ້ນລະຫວ່າງການສົ່ງເສີມ, ພັດທະນາ ແລະ ຂະຫຍາຍທຸກທ່າແຮງບົ່ມຊ້ອນກັບການຜະລິດສິນຄ້າ ແລະ ການບໍລິການ ທີ່ເປັນປາຍແຫຼມ, ສີຂຽວ ແລະ ມີຄວາມຍືນຍົງ.ຫຼຸດຜ່ອນ ແລະ ກ້າວໄປເຖິງຢຸດຕິການເອື່ອຍອີງໃສ່ການຂຸດຄົ້ນຊັບພະຍາກອນທຳມະຊາດເພື່ອສົ່ງອອກວັດຖຸດິບ.
– ຫັນເປັນອຸດສາຫະກຳ ແລະ ທັນສະໄໝ ໃນຂະແໜງໄຟຟ້າ, ສ້າງລະບົບຄວາມໝັ້ນຄົງ ແລະ ຍືນຍົງຂອງພະລັງງານ.
– ພັດທະນາເສດຖະກິດເຂດແຄວ້ນ ໃຫ້ເປັນລະບົບຕໍ່ເນື່ອງ ເພື່ອຍູ້ແຮງເສດຖະກິດໃຫ້ເຕີບໂຕໄວ ແລະ ໝັ້ນຄົງ ດ້ວຍການຍູ້ແຮງການສ້າງແຜນພັດທະນາເສດຖະກິດ-ສັງຄົມ ແບບກວມລວມນັບທັງລະດັບຊາດ ແລະ ລະດັບທ້ອງຖິ່ນ.
– ເຊື່ອມຈອດພື້ນຖານເສດຖະກິດຂອງປະເທດເຮົາເຂົ້າກັບອະນຸພາກພື້ນ, ພາກພື້ນ ຢ່າງເປັນລະບົບ ໂດຍສະເພາະກັບ ສສ ຫວຽດນາມ, ສປ ຈີນ, ລາຊະອານາຈັກໄທ, ກຳປູເຈຍ… ເປັນຕົ້ນດ້ານຄົມມະນາຄົມ, ດ້ານການຄ້າ, ການຮ່ວມມືເຕັກນິກ-ເຕັກໂນໂລຊີ, ການເງິນ-ເງິນຕາ ແລະ ອື່ນໆ;
– ສ້າງກົນໄກ ແລະ ປັບປຸງລະບຽບວິໄນ ເພື່ອສ້າງສະພາບແວດລ້ອມ ທີ່ເອື້ອອໍານວຍ ດຶງດູດການລົງທຶນທັງພາຍໃນ ແລະ ຕ່າງປະເທດ,ຫຼຸດຜ່ອນຂອດຂັ້ນທີ່ບໍ່ຈຳເປັນ, ຄຸ້ມຄອງການລົງທຶນຕາມກົດໝາຍ, ທັນສະໄໝ,ໂປ່ງໃສ, ວ່ອງໄວ ແລະ ກວດສອບໄດ້, ກັບຄືນມາທົບທວນນະໂຍບາຍ 3 ເປີດ ໃນການຂົນຂວາຍການລົງທຶນ ຄື: ເປີດໃຈ, ເປີດປະຕູ ແລະ ເປີດສິ່ງກີດຂວາງ ໃຫ້ໄດ້.
– ຫັນການຄຸ້ມຄອງການເງິນ, ງົບປະມານ ແລະ ເງິນຕາ ເຂົ້າສູ່ວິໄນເຂັ້ມງວດ ແລະ ມີຄວາມທັນສະໄໝ;ເພີ່ມຄວາມເປັນເຈົ້າຕົນເອງທາງດ້ານການເງິນຂອງແຕ່ລະທ້ອງຖິ່ນ;ເພີ່ມທະວີການຄຸ້ມຄອງໜີ້ສາທາລະນະ, ແກ້ໄຂໜີ້ສິນຢ່າງມີແຜນການ, ມີຈຸດສຸມ.
– ປັບໂຄງສ້າງການລົງທຶນຄືນໃໝ່, ຍົກສູງປະສິດທິຜົນການລົງທຶນຂອງລັດ, ຈັດສັນງົບປະມານເຂົ້າໃນບັນດາໂຄງການຈຸດສຸມ;ຍົກສູງຄວາມສັກສິດ, ປະສິດທິຜົນໃນການຄຸ້ມຄອງການເງິນ-ງົບປະມານ.
– ຮັກສາສະຖຽນລະພາບເງິນຕາ, ເພີ່ມທະວີການຄຸ້ມຄອງຕະຫຼາດເງິນຕາ ໃຫ້ເຂົ້າສູ່ລະບົບ, ຮັດກຸມ ແລະ ເຂັ້ມງວດ.
-ຄຸ້ມຄອງການນໍາໃຊ້ຊັບພະຍາກອນທໍາມະຊາດ ຢ່າງມີແຜນການ, ປະຢັດ ແລະ ໃຫ້ເກີດຜົນປະໂຫຍດສູງສຸດ; ປັບປຸງກົນໄກ, ຂັ້ນຕອນ ແລະ ກວດກາການຄຸ້ມຄອງ ແລະ ນຳໃຊ້ທີ່ດິນຂອງລັດໃຫ້ເຂັ້ມງວດ, ກຳນົດການເຊົ່າ ແລະ ສຳປະທານທີ່ດິນໃຫ້ໄປຕາມກົດໝາຍ; ແກ້ໄຂຢ່າງເປັນລະບົບການຈັບຈອງທີ່ດິນຊະຊາຍ,ຫັນການຄຸ້ມຄອງທີ່ດິນສູ່ລະບົບທັນສະໄໝ ແລະ ຮັດກຸມ.
– ເອົາໃຈໃສ່ວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາໂດຍສະເພາະການນໍາໃຊ້ດິຈີຕອນ,AI (ປັນຍາປະດິດ) ເຂົ້າໃນການຜະລິດ,ການບໍລິການ ແລະ ການຄຸ້ມຄອງ-ບໍລິຫານລັດໃຫ້ຫຼາຍຂຶ້ນ.
3. ກໍ່ສ້າງຮາກຖານການເມືອງໃຫ້ມີຄວາມເຂັ້ມແຂງ, ພັດທະນາຊົນນະບົດ ແລະ ແກ້ໄຂຄວາມທຸກຍາກ ຢ່າງມີຈຸດສຸມ ແລະ ມີປະສິດທິຜົນ, ປັບປຸງອົງການປົກຄອງຂັ້ນທ້ອງຖິ່ນໃຫ້ມີຄວາມເປັນເຈົ້າຕົນເອງຮອບດ້ານ.
– ການກໍ່ສ້າງຮາກຖານການເມືອງ ຍາມໃດກໍຕິດພັນກັບຄວາມໝັ້ນຄົງຂອງຊາດ, ຂອງລະບອບການເມືອງເພື່ອຮັບປະກັນໃຫ້ແກ່ການພັດທະນາໄດ້ດຳເນີນໄປຢ່າງເປັນປົກກະຕິ ແລະ ມີຄວາມຕໍ່ເນື່ອງ.
– ຍູ້ແຮງການພັດທະນາຊົນນະບົດ ແກ້ໄຂຄວາມທຸກຍາກຂອງປະຊາຊົນໃຫ້ເຂົ້າສູ່ລວງເລິກ, ຮອດປີ 2030 ສູ້ຊົນໃຫ້ອັດຕາສ່ວນຄວາມທຸກຍາກຫຼຸດລົງຍັງເຫຼືອໜຶ່ງຕົວເລກ, ຍົກລະດັບການແກ້ໄຂຄວາມທຸກຍາກເປັນວາລະແຫ່ງຊາດ.
– ສືບຕໍ່ສ້າງຄວາມເຂັ້ມແຂງໃຫ້ແກ່ທ້ອງຖິ່ນຫຼາຍຂຶ້ນ, ເສີມຂະຫຍາຍສິດເປັນເຈົ້າຂອງທ້ອງຖິ່ນ, ເປັນຕົ້ນແບ່ງຄວາມຮັບຜິດຊອບໃນການບໍລິຫານລັດ, ການຄຸ້ມຄອງເສດຖະກິດ-ສັງຄົມເຮັດໃຫ້ອົງການປົກຄອງທ້ອງຖິ່ນມີຄວາມເປັນເຈົ້າການສູງຂຶ້ນ; ແກ້ໄຂຂາດຕົວການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນ.
4.ຍົກລະດັບການພັດທະນາຂົງເຂດວັດທະນະທຳ-
ສັງຄົມໄລຍະໃໝ່.
– ພັດທະນາວຽກງານສຶກສາ ໃຫ້ທົ່ວເຖິງ, ມີຄຸນະພາບ ເພື່ອຮອງຮັບການພັດທະນາ ແລະ ເຊື່ອມໂຍງກັບສາກົນ.
ປັບປຸງໂຄງການຫຼັກສູດ,ສຸມໃສ່ສ້າງຖັນແຖວຄູ-ອາຈານ ໃຫ້ໄດ້ມາດຕະຖານດ້ານວິຊາການ ແລະ ຈັນຍາບັນ ເພື່ອຕອບສະໜອງໃຫ້ແກ່ລະບົບການສຶກສາທຸກລະດັບ ແລະ ແກ້ໄຂສະພາບຂາດແຄນຄູໃຫ້ໄດ້;ຫັນປ່ຽນລະບົບການສຶກສາສາມັນມາເປັນລະບົບ 6+3+3, ຂະຫຍາຍໂຮງຮຽນສາມັນວິຊາຊີບທີ່ມີຄຸນະພາບໃນທົ່ວປະເທດໃຫ້ຫຼາຍຂຶ້ນ;ພັດທະນາ ແລະ ຍົກລະດັບການຄົ້ນຄວ້າວິທະຍາສາດ ຢ່າງເປັນເຈົ້າການ ແລະ ມີຈຸດສຸມ;ເອົາໃຈໃສ່ສົ່ງເສີມ, ພັດທະນາວຽກງານກິລາ-ກາຍະກຳ ໃຫ້ມີຄວາມສາມາດແຂ່ງຂັນສູງຂຶ້ນຢ່າງເປັນລຳດັບ.
– ພັດທະນາວຽກງານສາທາລະນະສຸກ ໃຫ້ທັນສະໄໝ ແລະ ມີຄຸນະພາບສູງຂຶ້ນ.
ຍົກສູງປະສິດທິພາບຂອງການບໍລິຫານ-ຄຸ້ມຄອງວຽກງານສາທາລະນະສຸກ ຕາມທິດຫັນເປັນທັນສະໄໝ,ສາມາດກຸ້ມຕົນເອງດ້ານການເງິນ, ຫຼຸດຜ່ອນການແບກຫາບງົບປະມານຂອງລັດ. ກໍານົດຄືນສຸກສາລາຢູ່ຕາແສງ ແລະ ຊຸມຊົນບ້ານໃຫ້ຈະແຈ້ງ.
ປະຊາຊົນທຸກຄົນສາມາດເຂົ້າເຖິງການບໍລິການປິ່ນປົວສຸຂະພາບຂັ້ນພື້ນຖານ,ພັດທະນາບຸກຄະລາກອນການແພດ ໃຫ້ມີຄຸນນະພາບ, ສ້າງຜູ້ຊ່ຽວຊານແຕ່ລະດ້ານໃຫ້ຄົບຊຸດ, ພຽງພໍແລະ ສາມາດບໍລິການຮັບໃຊ້ສັງຄົມ ຢ່າງມີຄຸນະພາບ, ສະເໝີພາບ, ຍຸຕິທໍາ ແລະ ທົ່ວເຖິງ.
– ພັດທະນາວຽກງານແຮງານ ແລະ ສະຫວັດດີການສັງຄົມ ສູ່ຄຸນະພາບໃໝ່.
ພັດທະນາແຮງງານລາວ ດ້ານປະລິມານ ແລະ ຄຸນະພາບສອດຄ່ອງກັບຕຳແໜ່ງງານຕົວຈິງ ແລະ ຕະຫຼາດແຮງງານ;
ສຸມໃສ່ສ້າງຄວາມເຂັ້ມແຂງ ໃຫ້ແກ່ລະບົບປະກັນສັງຄົມ ແລະ ວຽກງານສະຫວັດດີການສັງຄົມ ເພື່ອຮັບປະກັນໃຫ້ພົນລະເມືອງທຸກຄົນ ໄດ້ຮັບການປົກປ້ອງຂັ້ນພື້ນຖານ.
ເອົາໃຈໃສ່ສ້າງເງື່ອນໄຂ, ຄວາມພ້ອມ ໃນການຮັບມື, ການປ້ອງກັນ, ການຄວບຄຸມ ແລະ ຟື້ນຟູ, ການຫຼຸດຜ່ອນຜົນກະທົບຈາກໄພພິບັດ; ສ້າງແຜນການຄຸ້ມຄອງ, ຕອບໂຕ້ຜົນກະທົບຂອງໄພພິບັດ; ເອົາໃຈໃສ່ການຄຸ້ມຄອງ, ຄວບຄຸມ ແລະ ຟື້ນຟູຫຼັງໄພພິບັດ ໃຫ້ມີປະສິດທິຜົນ.
– ໃນຊຸມປີຕໍ່ໜ້ານີ້ ຕ້ອງສືບຕໍ່ຍຶດໝັ້ນ ແລະ ເສີມຂະຫຍາຍຄຸນຄ່າວັດທະນະທໍາອັນດີງາມຂອງຊາດ, ສ້າງຄວາມສີວິໄລທາງດ້ານວັດຖຸ ໄປຄຽງຄູ່ກັບຄວາມສີວິໄລດ້ານຈິດໃຈແລະພັດທະນາວຽກງານທ່ອງທ່ຽວໃຫ້ມີຄວາມຍືນຍົງ.
ບູລະນະ, ຮັກສາມໍລະດົກ ໃຫ້ມີຄວາມຍືນຍົງ ແນໃສ່ພັດທະນາເສດຖະກິດມໍລະດົກ, ນໍາໃຊ້ມໍລະດົກເປັນແຫຼ່ງກໍາລັງແຮງ ໃຫ້ແກ່ການພັດທະນາ; ສ້າງແບບແຜນດຳລົງຊີວິດ ແລະ ວິຖີຊີວິດແບບໃໝ່ ໄປພ້ອມກັບການແກ້ໄຂ-ຕີຖອຍສິ່ງຫຼ້າຫຼັງງົມງວາຍ, ກະຕຸ້ນໃຫ້ເກີດຄ່ານິຍົມຮັກການຮຽນຮູ້ໃໝ່,ຄວາມເປັນຊາດລາວ, ສະຕິຊາດ, ເອກະລາດ, ເປັນເຈົ້າຕົນເອງໃຫ້ສູງຂຶ້ນ.
ສົ່ງເສີມ ແລະ ພັດທະນາການທ່ອງທ່ຽວ ບົນພື້ນຖານການຂຸດຄົ້ນຄວາມບົ່ມຊ້ອນ ແລະ ທ່າແຮງໄດ້ປຽບ ຂອງປະເທດເຮົາ ຢ່າງຕັ້ງໜ້າ ແລະ ມີການວາງແຜນທີ່ຊັດເຈນ ເປັນຮູບປະທຳ.
5. ເພີ່ມທະວີບົດບາດຄຸ້ມຄອງມະຫາພາກຂອງອົງການລັດ, ສືບຕໍ່ຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມ ຕາມທິດສ້າງລັດປະຊາທິປະໄຕປະຊາຊົນ ທີ່ປົກຄອງດ້ວຍກົດໝາຍ.
– ປັບປຸງການຄຸ້ມຄອງ-ບໍລິຫານລັດຂັ້ນສູນກາງ ແລະທ້ອງຖິ່ນ ສູ່ຄຸນະພາບໃໝ່, ຫັນເປັນທັນສະໄໝ, ຫັນເປັນດິຈີຕອນ, ຮັບປະກັນການບໍລິການຮັບໃຊ້ປະຊາຊົນ, ສັງຄົມ ວ່ອງໄວ, ສະເໝີພາບ, ຍຸຕິທໍາ, ໂປ່ງໃສ ແລະ ມີປະສິດທິຜົນຕາມກົດໝາຍ. ກຳນົດແຈ້ງກົນໄກຄຸ້ມຄອງເສດຖະກິດການເພີ່ມສິດຕົກລົງອະນຸຍາດ, ຂັ້ນການຄຸ້ມຄອງດ້ານເສດຖະກິດ ໃຫ້ທ້ອງຖິ່ນ.
– ສືບຕໍ່ປັບປຸງ, ບູລະນະກົງຈັກ-ການຈັດຕັ້ງ, ກົນໄກການເຄື່ອນໄຫວ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ສອດຄ່ອງກັບໜ້າທີ່ການເມືອງໃນໄລຍະໃໝ່.
– ສືບຕໍ່ຍົກສູງບົດບາດການນໍາພາ ຂອງຄະນະພັກແຕ່ລະຂັ້ນ ຕໍ່ອົງການຕຸລາການ, ສ້າງຄວາມເຂັ້ມແຂງ ໃນລະບົບສານປະຊາຊົນທຸກຂັ້ນ ເຮັດໃຫ້ປະຊາຊົນເຊື່ອໝັ້ນ ແລະ ໄວ້ວາງໃຈ ຕໍ່ການດຳເນີນຄະດີຕາມຂະບວນຍຸຕິທຳ.
– ປັບປຸງລະບົບກົງຈັກການຈັດຕັ້ງອົງການໄອຍະການປະຊາຊົນໃຫ້ສອດຄ່ອງກັບສະພາບເງື່ອນໄຂໃໝ່ສາມາດເຮັດພາລະບົດບາດຕິດຕາມ, ກວດກາການປະຕິບັດກົດໝາຍໃນການສືບສວນ-ສອບສວນແລະ ການແກ້ໄຂຄະດີຕາມຂະບວນຍຸຕິທໍາ.
-ສືບຕໍ່ປັບປຸງກົນໄກ, ການປະສານງານ, ການປະສານສົມທົບ ຂອງບັນດາອົງການໃນການດໍາເນີນຂະບວນຍຸຕິທໍາໃຫ້ກົມກຽວ, ໂລ່ງລ່ຽນ ແລະເຄື່ອນໄຫວຢ່າງມີປະສິດທິພາບ, ຮັບປະກັນຄວາມຖືກຕ້ອງ, ເປັນທໍາ; ແກ້ໄຂຄຳຕັດສິນ ຂອງສານທີ່ໃຊ້ໄດ້ເດັດຂາດແລ້ວ ໃຫ້ສໍາເລັດເປັນກ້າວໆ.
6. ເສີມຂະຫຍາຍບົດບາດຂອງແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມໃນພາລະກິດປົກປັກຮັກສາ ແລະ ສ້າງສາປະເທດຊາດ.
– ວຽກງານແນວໂຮມ, ສະຫະພັນນັກຮົບເກົ່າ ແລະວຽກງານມະຫາຊົນ ແມ່ນຄວາມຮັບຜິດຊອບໂດຍກົງຂອງພັກ. ຄະນະພັກແຕ່ລະຂັ້ນ ເປັນຜູ້ນໍາພາຊີ້ນໍາຢ່າງໃກ້ຊິດ, ຮອບດ້ານເຮັດໃຫ້ບັນດາອົງການດັ່ງກ່າວ ສືບຕໍ່ປະຕິບັດພາລະບົດບາດຕົ້ນຕໍໃນການເຕົ້າໂຮມຄວາມສາມັກຄີ, ໂຄສະນາ, ສຶກສາອົບຮົມ, ປຸກລະດົມ, ເສີມຂະຫຍາຍສິດເປັນເຈົ້າ ຂອງປະຊາຊົນລາວບັນດາເຜົ່າເຂົ້າໃນພາລະກິດປົກປັກຮັກສາ ແລະ ສ້າງພັດທະນາ.
– ພັກເຮົາ ຍາມໃດກໍຖືສໍາຄັນ ອົງການຈັດຕັ້ງທາງສັງຄົມ ມີບົດບາດ ແລະ ເປັນກໍາລັງແຮງໃຫ້ແກ່ການພັດທະນາ, ສ້າງສາປະເທດຊາດ, ເຄື່ອນໄຫວບົນພື້ນຖານແນວທາງ, ສອດຄ່ອງກັບລັດຖະທໍາມະນູນ ແລະ ກົດໝາຍ, ຖືເອົາຜົນປະໂຫຍດລວມ ຂອງພົນລະເມືອງເປັນກົກ.
– ອົງການລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ສືບຕໍ່ປັບປຸງນະໂຍບາຍ, ກົນໄກ, ການປະສານງານທີ່ກົມກຽວເພື່ອຊຸກຍູ້ສົ່ງເສີມ, ຄຸ້ມຄອງ ແລະ ອໍານວຍຄວາມສະດວກ ໃຫ້ແກ່ການເຄື່ອນໄຫວ ຂອງອົງການຈັດຕັ້ງສັງຄົມ.
7. ຕັ້ງໜ້າປະຕິບັດແນວທາງການພົວພັນຮ່ວມມືກັບຕ່າງປະເທດ.
ສືບຕໍ່ການພົວພັນຮ່ວມມືກັບຕ່າງປະເທດແບບຫຼາຍທິດ, ຫຼາຍຝ່າຍ, ຫຼາຍຮູບແບບ ແລະ ຫຼາຍລະດັບ ບົນພື້ນຖານການເຄົາລົບເອກະລາດ, ອຳນາດອະທິປະໄຕເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ.ສ້າງສະພາບແວດລ້ອມສາກົນ ທີ່ເອື້ອອຳນວຍໃຫ້ແກ່ການປະຕິບັດສອງໜ້າທີ່ຍຸດທະສາດ, ຖືເອົາການສ້າງຄວາມເຂັ້ມແຂງ, ຄວາມເປັນເຈົ້າຕົນເອງ ສົມທົບການຍາດແຍ່ງກຳລັງແຮງ ຂອງຍຸກສະໄໝ ເຂົ້າໃນການພັດທະນາ, ຍົກລະດັບຂີດຄວາມສາມາດແຂ່ງຂັນ ແລະ ການເຊື່ອມໂຍງກັບສາກົນຢ່າງເປັນເຈົ້າການ.
– ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານກັບ ສສ ຫວຽດນາມ ໃຫ້ເຂົ້າສູ່ລວງເລິກ.
-ສືບຕໍ່ເສີມຂະຫຍາຍສາຍພົວພັນ ແລະ ຄູ່ຮ່ວມຍຸດທະສາດຮອບດ້ານ, ໝັ້ນຄົງ, ຍາວນານຕາມທິດ 4 ດີ ກັບ ສປ ຈີນ ຕິດພັນກັບການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ, ຈີນ-ລາວ ໃຫ້ມີມາດຕະຖານສູງ, ລະດັບສູງ ແລະ ຄຸນນະພາບສູງ.
– ສືບຕໍ່ຮັດແໜ້ນມິດຕະພາບ ແລະ ການຮ່ວມມື ທີ່ເປັນມູນເຊື້ອກັບ ລາຊະອານາຈັກ ກຳປູເຈຍ ໃນຖານະທີ່ເປັນປະເທດໃກ້ຄຽງ ທີ່ເປັນຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ.
– ສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອອັນດີງາມກັບບັນດາປະເທດສັງຄົມນິຍົມ, ໃຫ້ຄວາມສຳຄັນ ຕໍ່ຄວາມສຳພັນໃກ້ຊິດ, ສ້າງຄວາມໄວ້ເນື້ອເຊື່ອໃຈກັບປະເທດບ້ານໃກ້ເຮືອນຄຽງ ແລະ ປະເທດເພື່ອນມິດອື່ນໆ ຢ່າງສະເໝີຕົ້ນສະເໝີປາຍ.
– ສືບຕໍ່ຮັດແໜ້ນ ແລະ ເສີມຂະຫຍາຍຄວາມສຳພັນ ທີ່ເປັນມູນເຊື້ອ ແລະ ຄູ່ຮ່ວມຍຸດທະສາດ ເພື່ອຄວາມໝັ້ນຄົງໃນອາຊີປາຊິຟິກ ກັບ ສະຫະພັນຣັດເຊຍ.
– ສືບຕໍ່ຍຶດໝັ້ນ ແລະ ສະໜັບສະໜູນ ການຮ່ວມມືຫຼາຍຝ່າຍ, ເຄົາລົບກົດບັດສະຫະປະຊາຊາດ ແລະ ສະໜັບສະໜູນການແກ້ໄຂຂໍ້ຂັດແຍ້ງໂດຍສັນຕິວິທີ;ເປີດກວ້າງການພົວພັນກັບພັກການເມືອງ ແລະຂະບວນການກ້າວໜ້າຢູ່ໃນໂລກ.
– ປະຕິບັດຢ່າງເຂັ້ມງວດ ຫຼັກການລວມສູນເປັນເອກະພາບ. , ປັບປຸງກົນໄກການຊີ້ນໍາ ແລະ ເຄື່ອນໄຫວວຽກງານຕ່າງປະເທດ ໃຫ້ວ່ອງໄວ ແລະ ທັນການ.
8.ເພີ່ມທະວີບົດບາດ, ຍົກສູງຄວາມສາມາດນໍາພາຂອງພັກ, ກໍ່ສ້າງ, ປັບປຸງພັກໃຫ້ປອດໃສ, ເຂັ້ມແຂງ ແລະໜັກແໜ້ນ.
– ເພີ່ມທະວີວຽກງານຄົ້ນຄວ້າທິດສະດີ, ສະຫຼຸບພຶດຕິກຳ ຂອງພັກ, ຄົ້ນຄວ້າທິດສະດີການເມືອງ, ແນວຄິດ-ທິດສະດີຂອງພັກ ໃຫ້ເລິກເຊິ່ງ,ສະໜອງຂໍ້ມູນໃຫ້ແກ່ການປັບປຸງ ແລະ ບູລະນະແນວທາງຂອງພັກ.ເດັດດ່ຽວຕໍ່ສູ້ປ້ອງກັນ ແລະ ຕ້ານການເສື່ອມຖອຍດ້ານແນວຄິດ, ຄຸນສົມບັດ, ແບບແຜນດຳລົງຊີວິດ, ປະກົດການຫັນປ່ຽນດ້ວຍຕົນເອງແລະການເສື່ອມຄຸນປ່ຽນທາດຢູ່ພາຍໃນພັກ; ຕ້ານ ແລະ ສະກັດກັ້ນທຸກຮູບການສໍ້ລາດບັງຫຼວງ ແລະ ການລະເມີດລະບຽບວິໄນທຸກຮູບແບບ.
– ປັບປຸງນະໂຍບາຍສົ່ງເສີມຜູ້ທີ່ມີຄວາມຮູ້ຄວາມສາມາດ, ປັບປຸງກົນໄກປ້ອງກັນພະນັກງານຜູ້ທີ່ມີຄວາມຮູ້ຄວາມສາມາດ, ມີຄວາມຫ້າວຫັນ, ມີຫົວຄິດປະດິດສ້າງ, ກ້າຄິດ, ກ້າເຮັດ, ກ້າຮັບຜິດຊອບ, ປະຕິບັດວິໄນຢ່າງເຂັ້ມງວດຕໍ່ຜູ້ລະເມີດກົດລະບຽບພັກ,ສ້າງຄວາມເຊື່ອມເສຍໃຫ້ແກ່ກຽດສັກສີຂອງພັກ.
– ຍົກສູງບົດບາດການນໍາພາຂອງພັກ, ປ່ຽນແປງໃໝ່ ກົນໄກການນຳພາຂອງພັກຢູ່ຂັ້ນທ້ອງຖິ່ນ, ໃນນີ້ ເລຂາຄະນະພັກແຂວງ, ນະຄອນຫຼວງວຽງຈັນ, ເມືອງ ແລະ ນະຄອນ ເປັນການນຳສູງສຸດຂອງທ້ອງຖິ່ນ,ບໍ່ຄວບຕຳແໜ່ງຫົວໜ້າອົງການປົກຄອງ.
– ປັບປຸງບົດບາດການນໍາພາຂອງພັກ ຢູ່ຕາແສງ ແລະ ຊຸມຊົນບ້ານກໍຄືໃນພາກສ່ວນລັດວິສາຫະກິດທີ່ເປັນຄໍຫອຍ, ບັນດາວິສາຫະກິດໃຫ້ເຂັ້ມແຂງ ສາມາດປະຕິບັດພາລະບົດບາດຂອງຕົນ ຢ່າງມີປະສິດທິຜົນ.
9. ເພີ່ມທະວີບົດບາດການນໍາພາຂອງພັກ ຕໍ່ວຽກງານພະນັກງານ, ສ້າງການຫັນປ່ຽນວຽກງານຄຸ້ມຄອງພະນັກງານໃຫ້ມີຄຸນະພາບ.
– ສ້າງແຜນກໍານົດພະນັກງານໃຫ້ຖືກຕ້ອງຕາມຂັ້ນຕອນ, ທຸກການຈັດຕັ້ງໃນລະບົບການເມືອງຕ້ອງສ້າງແຜນກໍານົດໃຫ້ຖືກຕ້ອງ, ເຂັ້ມງວດ ໂດຍເລີ່ມຈາກການເລືອກພະນັກງານເຂົ້າໃນແຜນກໍານົດ ຜ່ານການຄັດເລືອກ, ຄັດຈ້ອນ ບົນພື້ນຖານການສົມທົບ ລະຫວ່າງການເສີມຂະຫຍາຍປະຊາທິປະໄຕພາຍໃນກັບການປະຕິບັດຫຼັກການລວມສູນປະຊາທິປະໄຕ,ຫຼີກລ່ຽງການເຮັດຕາມແນວຄິດອັດຕະວິໄສຂອງບຸກຄົນ.
– ການກໍ່ສ້າງ, ບໍາລຸງພະນັກງານຕ້ອງປະຕິບັດຢ່າງເປັນລະບົບ, ເລືອກເປົ້າໝາຍຈາກແຜນກຳນົດພະນັກງານທີ່ໄດ້ຮັບຮອງແລ້ວ, ເປັນຜູ້ທີ່ມີຜົນງານດີເດັ່ນ, ມີຜົນສຳເລັດໃນການປະຕິບັດໜ້າທີ່ວຽກງານ, ເອົາການບໍາລຸງທິດສະດີການເມືອງ, ປະກອບຄວາມຮູ້ໃໝ່ ຕິດພັນກັບການຝຶກຝົນ, ທົດສອບພະນັກງານ ໃນຂະບວນການຕົວຈິງ.
– ປັບປຸງລະບອບການຕີລາຄາ, ເລືອກເຟັ້ນ ແລະ ສັບຊ້ອນ, ຈັດວາງພະນັກງານ ໃຫ້ສອດຄ່ອງກັບສະພາບຕົວຈິງໃນໄລຍະໃໝ່.
– ການເລືອກເຟັ້ນ,ສັບຊ້ອນພະນັກງານ ຫຼື ມອບໝາຍໜ້າທີ່ຮັບຜິດຊອບໃຫ້ພະນັກງານ ຕ້ອງອີງໃສ່ມາດຕະຖານຂອງພະນັກງານນໍາພາ-ຄຸ້ມຄອງແຕ່ລະປະເພດ,ໃຫ້ຄວາມສຳຄັນແກ່ມາດຕະຖານດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຈົງຮັກພັກດີຕໍ່ພາລະກິດປະຕິວັດ, ມີຄວາມຮູ້ຢ່າງເລິກເຊິ່ງ, ມີປະສົບການຕົວຈິງ, ມີຄວາມເປັນແບບຢ່າງ.
– ສ້າງກົນໄກຕີລາຄາພະນັກງານໃຫ້ແທດກັບຄວາມເປັນຈິງ, ວາງຄາດໝາຍ ແລະ ຕົວຊີ້ວັດຈະແຈ້ງ, ເອົາຜົນງານ, ຜົນສຳເລັດຕົວຈິງເປັນບ່ອນອີງໃນການສັບຊ້ອນ,ຈັດວາງພະນັກງານເຂົ້າໃນຕໍາແໜ່ງງານຕ່າງໆຢ່າງເໝາະສົມ ແລະ ຕາມທິດມີຂຶ້ນ-ມີລົງ,ມີເຂົ້າ-ມີອອກ, ຫັນເປັນໜຸ່ມ, ມີໂຄງປະກອບເພດ, ເຜົ່າ ຢ່າງເໝາະສົມ.
– ສືບຕໍ່ຄົ້ນຄວ້າ ແລະ ປະຕິຮູບລະບອບເງິນເດືອນ, ເງິນບຳເນັດ,ເງິນອຸດໜູນຄ່າຄອງຊີບແລະ ນະໂຍບາຍອື່ນໆຕໍ່ພະນັກງານ, ລັດຖະກອນ, ພາລະກອນ, ກຳລັງປະກອບອາວຸດ, ລວມທັງຜູ້ອອກແຮງງານຢູ່ວິສາຫະກິດຕ່າງໆ ໃຫ້ສອດຄ່ອງກັບເງື່ອນໄຂໃໝ່.
10.ເພີ່ມທະວີວຽກງານກວດກາ, ການປ້ອງກັນ, ຕ້ານ, ສະກັດກັ້ນ ແລະ ແກ້ໄຂພະຍາດອາຍາສິດ, ການສໍ້ລາດບັງຫຼວງ ໃຫ້ເຂັ້ມແຂງ ແລະ ເຂັ້ມງວດ, ເດັດຂາດ.
– ໃນຊຸມປີຕໍ່ໜ້ານີ້, ສືບຕໍ່ປັບປຸງ, ກໍ່ສ້າງພັກເຮົາໃຫ້ເປັນພັກທີ່ມີການຈັດຕັ້ງເຂັ້ມແຂງ,ມີຄວາມສາມັກຄີ ເປັນເອກະພາບໜັກແໜ້ນ ທາງດ້ານມານະຈິດ ແລະ ການກະທຳ, ມີການຄຸ້ມຄອງທີ່ເຂັ້ມງວດດ້ວຍລະບຽບວິໄນ ຢ່າງເຄັ່ງຄັດ.
– ສ້າງພັກໃຫ້ປອດໃສຂາວສະອາດ ໂດຍມີຄວາມເດັດຂາດ, ເຂັ້ມງວດ ໃນການປ້ອງກັນ, ຕ້ານ, ສະກັດກັ້ນ, ແກ້ໄຂ ແລະ ກຳຈັດປັດເປົ່າພະຍາດອາຍາສິດ, ປະກົດການຫຍໍ້ທໍ້ ແລະ ການສໍ້ລາດບັງຫຼວງ.
– ຕ້ອງຖືການຕິດຕາມ, ກວດກາ ແລະ ປະເມີນຜົນ ຄວາມສາມາດໃນການຜັນຂະຫຍາຍ, ຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄໍາສັ່ງ ຂອງພັກ ແລະ ຄວາມຮັບຜິດຊອບການເມືອງ ໃນການປະຕິບັດໜ້າທີ່ວຽກງານຕົວຈິງ ຂອງພະນັກງານ-ສະມາຊິກພັກ ເປັນໜ້າທີ່ໃຈກາງ ໃນການນໍາພາຊີ້ນໍາ.
– ຍົກສູງປະສິດທິພາບ ການກວດກາ,ເດັດດ່ຽວຕໍ່ສູ້, ຕີຖອຍ ການລະເມີດລະບຽບວິໄນ ແລະ ປະກົດການອາຍາສິດ, ເຮັດວຽກແບບຜິວເຜີນ, ບໍ່ຕິດພັນກັບການແກ້ໄຂບັນຫາຕົວຈິງ, ປະກົດການເອກະທິປະໄຕ, ການສວຍໃຊ້ໜ້າທີ່ກົດໜ່ວງຖ່ວງດຶງ ເພື່ອຫາຜົນປະໂຫຍດສ່ວນຕົວ, ການຍັກຍອກ ແລະ ການຟຸມເຟືອຍງົບປະມານ, ທຶນຮອນ, ຊັບສິນຂອງລັດ.
– ສ້າງ ແລະ ປັບປຸງບັນດານິຕິກໍາໃຕ້ກົດໝາຍກ່ຽວກັບການກວດກາ,ປັບປຸງ ແລະສ້າງນິຕິກຳທີ່ຈຳເປັນ ກໍານົດໃຫ້ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສື່ມວນຊົນ ແລະ ປະຊາຊົນເຂົ້າຮ່ວມໃນການຕິດຕາມ, ກວດກາການປະຕິບັດໜ້າທີ່ຂອງຄະນະພັກ, ບັນດາອົງການລັດ, ສະມາຊິກພັກ, ພະນັກງານ-ລັດຖະກອນ ກໍຄື ການເຜີຍແຜ່ຜົນຂອງການກວດກາ ແລະ ການແກ້ໄຂຜົນຂອງການກວດກາ ໃຫ້ທົ່ວສັງຄົມໄດ້ຮັບຮູ້.
ຮ່າງລາຍງານການເມືອງສະບັບນີ້ ແມ່ນລວມຍອດສະຕິປັນຍາລວມໝູ່ ຂອງທົ່ວພັກ, ທົ່ວກໍາລັງປະກອບອາວຸດ ແລະ ທົ່ວປວງຊົນ ໂດຍຜ່ານຂະບວນການຄົ້ນຄວ້າ, ສໍາມະນາ, ລະດົມຄວາມຄິດເຫັນ ທັງທາງກວ້າງ ແລະ ທາງເລິກ ຕະຫຼອດໄລຍະເກືອບ 2 ປີຜ່ານມາ, ເຊິ່ງໄດ້ສ່ອງແສງໃຫ້ເຫັນມານະຈິດປະຕິວັດ, ຄວາມຫວັງ, ຄວາມຄອງຄອຍ ຂອງທົ່ວພັກ, ທົ່ວສັງຄົມ ໃນການແກ້ໄຂບັນຫາ ໃຫ້ເປັນຮູບປະທຳ, ສ້າງພື້ນຖານອັນໜັກແໜ້ນ ໃຫ້ແກ່ການສ້າງປະຖົມປັດໄຈ ກ້າວຂຶ້ນສູ່ສັງຄົມນິຍົມຂອງປະເທດເຮົາ.
ບົນພື້ນຖານນັ້ນ, ສະເໜີໃຫ້ບັນດາສະຫາຍຜູ້ແທນກອງປະຊຸມໃຫຍ່ຄົ້ນຄວ້າ, ປະກອບຄຳເຫັນ ຢ່າງເລິກເຊິ່ງ ເຂົ້າໃສ່ເນື້ອໃນລາຍງານການເມືອງສະບັບນີ້ ຢ່າງມີຄວາມຮັບຜິດຊອບສູງ ເພື່ອຮັບຮອງເອົາດ້ວຍຄວາມເປັນເອກະພາບ ເພື່ອນຳໄປເປັນທິດທາງໃນການຜັນຂະຫຍາຍ, ຈັດຕັ້ງປະຕິບັດ ໃຫ້ເກີດປະໂຫຍດສູງສຸດ, ສ້າງໃຫ້ມີທ່ວງທ່າໃໝ່ ໃຫ້ແກ່ການພັດທະນາກ້າວຂຶ້ນ ຂອງປະເທດຊາດຂອງພວກເຮົາ ໃນຊຸມປີຕໍ່ໜ້າ.
ຂ່າວ-ພາບ: ວຽງຂັນທາຍ
