ກໍາມະການສໍາຮອງສູນກາງພັກ, ເລຂາພັກແຂວງ ເຈົ້າແຂວງ ບໍ່ແກ້ວ, ສະຫາຍ ບົວຄົງ ນາມມະວົງ ໄດ້ລາຍງານສະພາບທົ່ວໄປໃນໄລຍະ 5 ປີຜ່ານມາ (2016-2020) ຢູ່ແຂວງບໍ່ແກ້ວ ທີ່ ກອງປະຊຸມໃຫຍ່ຜູ້ແທນອົງຄະນະພັກ ແຂວງ ບໍ່ແກ້ວ ຄັ້ງທີ VI ທີ່ໄດ້ຈັດຂຶ້ນໃນຕອນ ເຊົ້າຂອງວັນທີ 5 ຕຸລາ ທີ່ຜ່ານມານີ້, ທີ່ຫໍປະຊຸມໃຫຍ່ຂອງແຂວງວ່າ: ການເຕີບໂຕທາງດ້ານເສດຖະກິດໃນໄລຍະ 5 ປີຜ່ານມາ (2016-2020) ພາຍໃນແຂວງບໍ່ແກ້ວ ມີການຂະຫຍາຍຕົວຢ່າງຕໍ່ເນື່ອງ ສະເລ່ຍ 7,4% ຕໍ່ປີ ລວມຍອດຜະລິດຕະພັນພາຍໃນ (GDP) ໃນປີ 2019 ບັນລຸໄດ້ 3.181,82 ຕື້ກີບ ລາຍຮັບສະເລ່ຍຕໍ່ຫົວຄົນບັນລຸໄດ້ 1.900 ກວ່າໂດລາຕໍ່ຄົນຕໍ່ປີ. ໄດ້ຂະຫຍາຍຕາໜ່າງໄປສະນີ, ໂທລະຄົມມະນາຄົມ ໄປສູ່ເຂດຊົນນະບົດຫ່າງໄກສອກຫຼີກ, ເຮັດໃຫ້ປະຊາຊົນບັນດາເຜົ່າໄດ້ນໍາໃຊ້ເຄືອຂ່າຍໂທລະສັບ ແລະ ອິນເຕີເນັດກວມເຖິງ 98% ຂອງຈໍານວນປະຊາກອນທັງໝົດໃນທົ່ວແຂວງ. ໄດ້ເອົາໃຈໃສ່ເບິ່ງແຍງສຸຂະພາບແມ່ ແລະ ເດັກນ້ອຍ, ໂພຊະນາການ, ສັກຢາກັນພະຍາດໃຫ້ແກ່ກຸ່ມເປົ້າໝາຍຢ່າງທົ່ວເຖິງ ເຮັດໃຫ້ອັດຕາການຕາຍຂອງແມ່ ແລະ ເດັກຫຼຸດລົງ, ຍົກລະດັບຄຸນນະພາບ ແລະ ຄວາມທັນສະໄໝຂອງການບໍລິການຢູ່ແຕ່ລະຂັ້ນຢ່າງຕໍ່ເນື່ອງ.
ສະຫາຍ ບົວຄົງ ໃຫ້ຮູ້ຕື່ມວ່າ: ຂົງເຂດຖະແຫຼງຂ່າວ, ວັດທະນະທໍາ ແລະ ທ່ອງທ່ຽວໄດ້ຮັບການປັບປຸງໃຫ້ມີຄຸນນະພາບດີຂຶ້ນ ສາມາດເຜີຍແຜ່ຂໍ້ມູນຂ່າວສານ ການເຄື່ອນໄຫວຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບ, ກົດໝາຍຂອງລັດ, ບົດຮຽນການພັດທະນາ, ສາລະໜ້າຮູ້ ແລະ ຄວາມບັນເທີງໃຫ້ແກ່ສັງຄົມໂດຍຜ່ານພາຫະນະສື່ມວນຊົນຕ່າງໆ,
ເອົາໃຈໃສ່ໃນການປົກປັກຮັກສາມໍລະດົກທາງດ້ານວັດທະນະທໍາໃຫ້ມີຄວາມຍືນຍົງ, ສ້າງຄອບຄົວວັດທະນະທຳ ກວມ 73,17% , ສ້າງບ້ານວັດທະນະທຳກວມ 74,59%, ບ້ານວັດທະນະທໍາກວມ 23,80%; ສົ່ງເສີມການຈັດງານບຸນປະເພນີບັນດາເຜົ່າ ແລະ ງານເທດສະການຕ່າງໆ ຕິດພັນກັບການຊຸກຍູ້ສົ່ງເສີມການທ່ອງທ່ຽວ ແລະ ສາມາດສ້າງລາຍຮັບໄດ້ເພີ່ມຂຶ້ນຈາກການທ່ອງທ່ຽວ. ການພັດທະນາຊົນນະບົດຕາມທິດສາມສ້າງ ໄດ້ເຕົ້າໂຮມບ້ານນ້ອຍກາຍເປັນບ້ານໃຫຍ່ ເຮັດໃຫ້ຈໍານວນບ້ານຫຼຸດລົງ ເອົາໃຈໃສ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ພັດທະນາພື້ນຖານໂຄງລ່າງ ແລະ ສົ່ງເສີມການຜະລິດເປັນສິນຄ້າ, ຈັດສັນເນື້ອທີ່ທໍາການຜະລິດ, ທີ່ຕັ້ງພູມລໍາເນົາຄົງທີ່ ມີ 5 ຈຸດ, ຄອບຄົວ ແລະ ບ້ານພັດທະນາເພີ່ມຂຶ້ນ ໃນ 5 ປີຜ່ານມາ ສາມາດສ້າງບ້ານພັດທະນາໄດ້ທັງໝົດ 98 ບ້ານ ແລະ ວຽກງານອື່ນໆ.
ຂ່າວ-ພາບ: ແສງເພັດ ແຊ່ຈ່າວ
