ກອງສຳຫຼວດ ແລະ ປັກຫຼັກໝາຍຊາຍແດນ ລາວ-ກຳປູເຈຍ ເມືອງ ໂຂງ ແຂວງ ຈຳປາສັກ ໄດ້ສະຫຼຸບ ການຈັດຕັ້ງປະຕິບັດວຽກງານພາຍໃນປີ 2025 ທີ່ຜ່ານມາ.
ໂດຍລວມແລ້ວ, ແຕ່ເດືອນ ພຶດສະພາ 2023 ມາເຖິງທ້າຍປີ 2025, ວຽກງານກຳນົດຈຸດປັກຫຼັກໝາຍຊາຍແດນ ລາວ-ກຳປູເຈຍ ແມ່ນສຳເລັດແລ້ວ 280 ຫຼັກໝາຍ ຈາກທັງໝົດ 510 ຫຼັກໝາຍ (ເທົ່າກັບ 54.9%) ແລະ ກໍ່ສ້າງສຳເລັດແລ້ວ 213 ຫຼັກໝາຍ (ເທົ່າກັບ 41.76%).
ທ່ານ ພັນໂທ ໂພສະຫວັນ ພິມມະວົງ, ຫົວໜ້າພະແນກແຜນການສັງລວມ, ກະຊວງປ້ອງກັນປະເທດ ລາຍງານໃນວັນທີ 5 ພຶດສະພາ ນີ້ວ່າ: ຜົນສຳເລັດທີ່ພົ້ນເດັ່ນໃນປີ 2025 ແມ່ນສາມາດກຳນົດຈຸດທີ່ຈະປັກຫຼັກໝາຍແບບໃໝ່ປ່ຽນແທນຫຼັກໝາຍເກົ່າ ແລະ ປັກຫຼັກໝາຍເພີ່ມເຕີມໄດ້ທັງໝົດ 76 ຫຼັກໝາຍ, ພ້ອມທັງສຳເລັດການກໍ່ສ້າງຫຼັກໝາຍຕົວຈິງໃນພື້ນທີ່ໄດ້ເຖິງ 67 ຫຼັກໝາຍ.
ທີມງານວິຊາການໄດ້ນຳໃຊ້ເຕັກໂນໂລຊີ GPS ລະບົບສອງຄື້ນ ເພື່ອວັດແທກຄ່າພິກັດຫຼັກໝາຍໄດ້ 77 ຫຼັກໝາຍ (ແຕ່ຫຼັກໝາຍ 034 ຫາ 078) ແລະ ສຳເລັດການສ້າງຫຼັກບ໋ອກເຄົ້າພິກັດພື້ນຖານໃນຂັ້ນຕ່າງໆອີກຫຼາຍສິບຫຼັກ ເພື່ອເປັນບ່ອນອີງທາງດ້ານວິຊາການທີ່ຊັດເຈນ.
ໄດ້ມີການລົງສຳຫຼວດພື້ນທີ່ຕົວຈິງເພື່ອສຶກສາຄວາມເປັນໄປໄດ້ໃນການກໍ່ສ້າງຂົວຂ້າມເຊລຳເພົາ ແລະ ເສັ້ນທາງເຊື່ອມຕໍ່ໄປຍັງ ແຂວງ ເພຣຍວິເຮຍ ປະເທດ ກຳປູເຈຍ, ເພື່ອອຳນວຍຄວາມສະດວກໃນການໄປມາຫາສູ່ ແລະ ການຄ້າຂາຍລະຫວ່າງສອງຊາດ.
ສອງຝ່າຍໄດ້ຮ່ວມກັນທັງຕິດຕາມ ແລະ ແກ້ໄຂບັນຫາການບຸກເບີກເນື້ອທີ່ກະສິກຳ ທີ່ລ່ວງລໍ້າຊາຍແດນຢ່າງໃກ້ຊິດ.
ຜົນສຳເລັດດັ່ງກ່າວ ແມ່ນເກີດຈາກການປະສານງານກັນຂອງພະນັກງານວິຊາການຈາກຫຼາຍພາກສ່ວນ ບໍ່ວ່າຈະເປັນຈາກກະຊວງການຕ່າງປະເທດ, ກົມແຜນທີ່ກອງທັບ, ກອງບັນຊາການທະຫານຊາຍແດນ ແລະ ກົມແຜນທີ່ແຫ່ງຊາດ ທີ່ໄດ້ຮ່ວມແຮງຮ່ວມໃຈກັນປະຕິບັດໜ້າທີ່ ເພື່ອປົກປັກຮັກສາອະທິປະໄຕ ແລະ ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມືແບບຍືນຍົງ.
