ງານມະຫະກຳຊັບສິນທາງປັນຍາ 2021 ທີ່ຈະໄດ້ຈັດຂຶ້ນໃນລະຫວ່າງວັນທີ 21-26 ເມສາ 2021 ນີ້ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ຈະມີການວາງສະແດງຜົນງານຊັບສິນທາງປັນຍາຂອງລາວ ຫຼາຍກວ່າ 100 ຮ້ານເຂົ້າຮ່ວມ ແລະ ນອກນັ້ນຜູ້ທ່ຽວງານຍັງຈະໄດ້ສໍາດຜັດ ກັບ 6 ສິນຄ້າທີ່ຈົດທະບຽນຖິ່ນກຳເນີດ ຄື: ຊາກໍແມນ ຈາກແຂວງຜົ້ງສາລີ, ເຂົ້າໄກ່ນ້ອຍ ຈາກແຂວງຫົວພັນ ແລະ ແຂວງຊຽງຂວາງ, ຜ້າໄໝຫົວພັນ ຈາກແຂວງຫົວພັນ, ຜ້າໄໝຫຼວງພະບາງ ຈາກແຂວງຫຼວງພະບາງ, ກາເຟບໍລະເວນ ແລະ ຊາປາກຊ່ອງ ຈາກແຂວງຈຳປາສັກ ອີກດ້ວຍ.
ທ່ານ ນາງ ຂັນລາສີ ແກ້ວບຸນພັນ ໄດ້ກ່າວໃນພິທີຖະແຫຼງຂ່າວກ່ຽວກັບການຈັດງານດັ່ງກ່າວເມື່ອວັນທີ 8 ເມສາ 2021 ທີ່ຜ່ານມາໂດຍມີເນື້ອໃນບາງຕອນທີ່ສໍາຄັນວ່າ: ການຈັດງານມະຫະກຳຊັບສິນທາງປັນຍາ ປະຈຳປີ 2021 ຂຶ້ນ ເພື່ອສະເຫຼີມສະຫຼອງວັນຊັບສິນທາງປັນຍາໂລກ 26 ເມສາ 2021 ຄົບຮອບ 21 ປີ. ງານດັ່ງກ່າວ ເພື່ອເປັນການເຜີຍແຜ່ ແລະ ສົ່ງເສີມຜົນງານທາງດ້ານຊັບສິນທາງປັນຍາ ໂດຍສະເພາະ ບົດບາດຂອງຊັບສິນທາງປັນຍາ ຕໍ່ການສົ່ງເສີມຫົວຄິດປະດິດສ້າງ, ຫົວຄິດປະດິດຄິດແຕ່ງ ທີ່ນໍາໃຊ້ນະວັດຕະກຳເຂົ້າໃນການພັດທະນາເຕັກໂນໂລຊີ, ການສ້າງເອກະລັກຂອງສິນຄ້າ, ການອອກແບບຜະລິດຕະພັນທີ່ໂດດເດັ່ນ, ການປັບປຸງພັນພືດໃໝ່, ການສ້າງສັນຜົນງານທາງດ້ານວິທະຍາສາດ, ສິລະປະກໍາ ແລະ ວັນນະກໍາ, ການສົ່ງເສີມຜະລິດຕະພັນທາງກະສິກໍາ, ການສະແດງອອກທາງດ້ານຮີດຄອງປະເພນີ ວັດທະນະທຳແບບດັ່ງເດີມ ແລະ ການແກ້ໄຂຂໍ້ຂັດແຍ່ງຊັບສິນທາງປັນຍາ.
ທ່ານ ນາງ ຂັນລາສີ ໄດ້ກ່າວຕື່ມວ່າ: ນອກຈາກການວາງສະແດງຜົນງານຊັບສິນທາງປັນຍາແລ້ວ ພາຍໃນງານ ຍັງຈະມີກອງປະຊຸມສໍາມະນາ ໃນຫົວຂໍ້ “ຊັບສິນທາງປັນຍາ ແລະ ວິສາຫະກິດຂະໜາດນ້ອຍ ແລະ ກາງ, ນຳຄວາມຄິດຂອງທ່ານເຂົ້າສູ່ຕະຫຼາດ” ຊຶ່ງເປັນການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ ໃນການສ້າງຕັ້ງທຸລະກິດໃໝ່ ໃຫ້ໄດ້ຮັບຄວາມຄິດສ້າງສັນໃນການດໍາເນີນທຸລະກິດຂອງຕົນເອງຈາກ ຫົວຄິດປະດິດສ້າງ, ຫົວຄິດປະດິດແຕ່ງ ເພື່ອເຮັດໃຫ້ທຸລະກິດເຫຼົ່ານັ້ນຜະລິດສິນຄ້າ ແລະ ການບໍລິການ ອອກສູ່ຕະຫຼາດ ຊຶ່ງຫົວໜ່ວຍທຸລະກິດຂະໜາດນ້ອຍ ແລະ ຂະໜາດກາງສ່ວນຫຼາຍ ກໍເລີ່ມຕົ້ນສ້າງຕັ້ງທຸລະກິດຈາກຫົວຄິດປະດິດສ້າງຂອງຕົນເອງ.
