ທ່ານ ສົມຫວັງ ຂໍາມະວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງເຊກອງ ໄດ້ໃຫ້ສໍາພາດກັບສື່ມວນຊົນແຂວງ ເມື່ອວັນທີ 26 ພຶດສະພາ 2021 ຜ່ານມານີ້ ວ່າ: ແຂວງ ເຊກອງ ມີແຜນການປູກໄມ້ໃຫ້ໄດ້ຈໍານວນ 1.040 ເຮັກຕາເນື່ອງໃນວັນປູກຕົ້ນໄມ້ແຫ່ງຊາດ (ວັນທີ 1 ມິຖຸນາ 2021) ຊຶ່ງປະຈຸບັນໄດ້ກຽມແກ່ນພັນໄມ້ໄວ້ແລ້ວ 1.000 ກິໂລ ແລະ ເບ້ຍໄມ້ປະເພດຕ່າງໆ ໄດ້ 1,2 ລ້ານເບ້ຍ, ນອກນັ້ນ ພະແນກກະສິກໍາ ແລະ ປ່າໄມ້ ແຂວງ ຈະຮ່ວມກັບອົງການປົກຄອງທ້ອງຖິ່ນຕ່າງໆ ໃນການຟື້ນຟູປ່າທໍາມະຊາດທີ່ຊຸດໂຊມໃຫ້ໄດ້ 10.200 ເຮັກຕາ.
ສໍາລັບ ກິດຈະກໍາປູກຕົ້ນໄມ້ໃນໂອກາດວັນດັ່ງກ່າວ ຢູ່ພາຍໃນແຂວງ ເຊກອງ ແມ່ນເນັ້ນໃສ່ປູກຕົ້ນໄມ້ຕາມເທສະບານແຂວງ, ເທສະບານເມືອງ ແລະ ປູກຕົ້ນໄມ້ຕາມປ່າສະຫງວນ ເພື່ອຟື້ນຟູປ່າທໍາມະຊາດ ໃຫ້ອຸດົມສົມບູນຢ່າງຍືນນານ ຊຶ່ງ ປະກອບມີປະເພດໄມ້ດູ່ທໍາມະຊາດ, ໄມ້ບົງແດງ, ໄມ້ຈໍາປາປ່າ, ໄມ້ແຕ້, ໄມ້ສັກ, ໄມ້ຕິ້ວ, ຕົ້ນໄມ້ກິນໝາກ ແລະ ອື່ນໆ.
ພ້ອມກັນນັ້ນ, ທ່ານ ສົມຫວັງ ຂໍາມະວົງ ໄດ້ຮຽກຮ້ອງມາຍັງມວນຊົນແຂວງເຊກອງ ໃຫ້ພ້ອມກັນປົກປັກຮັກສາ ແລະ ຫວງແຫນປ່າໄມ້ ພ້ອມກັນປະກອບສ່ວນຕາມເງື່ອນໄຂຄວາມອາດສາມາດ ເຂົ້າໃນການປູກໄມ້, ຟື້ນຟູປ່າ ແລະ ປົກປັກຮັກສາປ່າໄມ້ ໃຫ້ນັບມື້ມີຄວາມອຸດົມສົມບູນ ເພື່ອຕອບສະໜອງຄວາມຮຽກຮ້ອງຕ້ອງການ ວັດຖຸດິບດ້ານໄມ້ ແລະ ຜົນຜະລິດປ່າໄມ້ໃຫ້ໄດ້ຢ່າງຍືນນານ ພ້ອມທັງເປັນການປົກປັກຮັກສາສິ່ງແວດລ້ອມ ຕາມທິດສີຂຽວ ແລະ ຍືນຍົງ.
ຂ່າວ-ພາບ: ພຸດທະສອນ
