ບໍລິສັດ ລາວໄອເອັດຊີມາຍນິງ ຈຳກັດ ຜູ້ດຽວ ໄດ້ຮັບອະນຸຍາດຈາກອໍານາດການປົກຄອງແຂວງຫຼວງພະບາງ ໃນການສຳປະທານໂຄງການຂຸດຄົ້ນ ແລະ ປຸງແຕ່ງ ຫີນອ່ອນມາໂບ ຢູ່ບ້ານແດນສະຫວ່າງ ທີ່ນະຄອນ ຫຼວງພະບາງ ແຂວງຫຼວງພະບາງ ໃນເນື້ອທີ່ຂຸດຄົ້ນທັງໝົດ 4 ເຮັກຕາ ໂດຍຈະລົງທຶນທັງໝົດ 4 ລ້ານໂດລາ ຊຶ່ງມີໄລຍະສໍາປະທານ 5 ປີ ນັບແຕ່ເດືອນກັນຍາ 2020 ເປັນຕົ້ນໄປ ແລະ ຫິນອ່ອນນີ້ຈະກາຍເປັນສິນຄ້າໃໝ່ ເພື່ອສົ່ງອອກຢູ່ແຂວງຫຼວງພະບາງໃນອະນາຄົດ.
ພິທີເຊັນສັນຍາການສຳປະທານດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ພະແນກແຜນການ ແລະ ການລົງທຶນແຂວງ ຫຼວງພະບາງ ເຊັນໂດຍ ຫົວໜ້າພະແນກແຜນການ ແລະ ການລົງທຶນແຂວງຫຼວງພະບາງ ທ່ານ ນາງ ສີລີພອນ ສຸພັນທອງ ແລະ ປະທານບໍລິສັດລາວໄອເອັດຊີມາຍນິງ ຈຳກັດຜູ້ດຽວ ທ່ານ ປີຊາໄຊ ແກ້ວໄຊຍະຈັກ ໂດຍເຂົ້າຮ່ວມເປັນສັກຂີພິຍານຂອງເຈົ້າແຂວງຫຼວງພະບາງ ທ່ານ ຄຳຂັນ ຈັນທະວີສຸກ.
ເຈົ້າແຂວງຫຼວງພະບາງ ທ່ານ ຄຳຂັນ ຈັນທະວີສຸກ ໄດ້ກ່າວໃນພິທີດັ່ງກ່າວວ່າ: ການສຳປະທານໂຄງການຂຸດຄົ້ນ ແລະ ປຸງແຕ່ງຫີນອ່ອນ ດັ່ງກ່າວນີ້ເປັນໂຄງການລິເລີ່ມໃນການພັດທະນາຊັບພະຍາກອນທຳມະຊາດທີ່ມີຢູູ່ໃນທ້ອງຖິ່ນໃຫ້ເປັນສິນຄ້າສົ່ງອອກ ທີ່ໄດ້ມາດຕະຖານສາກົນ ແລະ ກາຍເປັນຜະລິດຕະພັນ ທີີ່ຈະເປັນສິນຄ້າໃໝ່ຂອງປະເທດລາວ ກໍຄືຂອງແຂວງຫຼວງພະບາງໃນອະນາຄົດ.
ຂ່າວ: ວຽງຈັນທາຍ
ຂໍ້ມູນ-ພາບ: ອາພຸດເດດ ບຸບຜາ
