ທ່ານ ວັນທາ ພົມວິໄລ ຫົວໜ້າພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ ໄດ້ລາຍງານໃນວັນທີ 1 ມີຖຸນາ 2021 ຜ່ານມານີ້ວ່າ : ໃນໄລຍະ 5 ເດືອນຜ່ານມາ ( ແຕ່ເດືອນມັງກອນ 2021 ຫາ ເດືອນພຶດສະພາ 2021 ) ແຂວງຫຼວງນໍ້າທາ ສາມາດສົ່ງອອກສີນຄ້າ ປະເພດພືດກະສິກໍາ ແລະ ອຸດສາຫະກໍາປຸງແຕ່ງ ໄປ ສປ ຈີນ ລວມມູນຄ່າທັງໝົດ 60 ລ້ານກວ່າໂດລາສະຫະລັດ ຊຶ່ງສີນຄ້າທີ່ສົ່ງອອກຖ້າທຽບໃສ່ປີຜ່ານມາໃນໄລຍະດຽວກັນເພີ່ມຂື້ນ 68 %.
ສໍາລັບ ປະເພດສີນຄ້າທີ່ສົ່ງອອກ ປະກອບມີ : ອ້ອຍລໍາ ຈໍານວນ 684. 971 ໂຕນ, ຢາງພາລາອົບແຫ້ງ ຈໍານວນ 9.263 ໂຕນ, ຢາງພາລາກ້ອນ ຈໍານວນ 8.787 ໂຕນ, ໝາກກ້ວຍຈໍານວນ 17.309 ໂຕນ, ແປ້ງມັນຕົ້ນ ຈໍານວນ 11.202 ໂຕນ, ໝາກແຕງໂມ ຈໍານວນ 13.079 ໂຕນ, ໝາກອຶ ຈໍານວນ 2.892 ໂຕນ, ໝາກຖົ່ວເຫຼືອງ ຈໍານວນ 2.348 ໂຕນ, ໝາກຕາວ ຈໍານວນ 495 ໂຕນ ແລະ ຊາແຫ້ງຈໍານວນ 5.000 ໂຕນ.
ຂ່າວ-ພາບ: ສົມພອນ ຂຸນດາວົງ
