ຄະນະແພດໝໍ ຊ່ຽວຊານ ຈາກ ສສ ຫວຽດນາມ ນຳໂດຍ ທ່ານ ເຣື້ອງແອ໋ງເຢືອງ ຮອງກົມຄຸ້ມຄອງກວດ ແລະ ປິ່ນປົວພະຍາດ ສສ ຫວຽດນາມ, ມີຊ່ຽວຊານ ດ້ານຂະແໜງໄວຣັສ, ຈຸລິນຊີ, ຊ່ຽວຊານສະກັດກັ້ນພະຍາດຊຶມເຊື້ອ ແລະ ທິມແພດຈາກ ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໄດ້ເດີນທາງມາຮອດແຂວງຈຳປາສັກໃນວັນທີ 15 ພຶດສະພາ 2021 ທີ່ຜ່ານມາ ເພື່ອຊ່ວຍແກ້ໄຂ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ແຂວງຈຳປາສັກ ຊຶ່ງທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ພ້ອມຄະນະ ໄດ້ຕ້ອນຮັບ.
ໃນການມາຊ່ວຍເຫຼືອຄັ້ງນີ້ ທີມງານແພດໝໍ ແລະ ຊ່ຽວຊານ ຈາກ ສສ ຫວຽດນາມຈະຊ່ວຍເຫຼືອກ່ຽວກັບການຝຶກອົມຮົມ, ແນະນຳຂັ້ນຕອນ, ວິທີການການສັກຢາວັກຊີນ ແລະ ການປິ່ນປົວ, ການຄຸ້ມຄອງ ແນະນໍາການປິ່ນປົວບໍ່ໃຫ້ຄົນເຈັບເສຍຊີວິດ, ການໃຫ້ຄວາມຮູ້ດ້ານວິຊາການ, ການຮັກສາ ແລະ ການຊອກຫາຜູ້ສໍາຜັດໃກ້ຊິດກັບຜູ້ຕິດເຊື້ອ ເພື່ອປ້ອງກັນ ຄວບຄຸມ ການລະບາດຂອງພະຍາດໂຄວິດ-19 ຢູ່ໃນຊຸມຊົນ.
ຂ່າວ: ທັດຊະນະ
