ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຈໍາປາສັກ ໄດ້ໄລ່ສະກັດກັກລົດຟໍຈຸນເນີ ໝາຍເລກທະບຽນ ວຜ 8999 ວຽງຈັນ ເມື່ອບໍ່ດົນມານີ້ ຫຼັງໜີດ່ານກວດຢູ່ເຂດບ້ານນາຝັ່ງ ເມືອງໂຂງ ແລະ ສາມາດໄລ່ທັນ ແລະ ສະກັດຈັບໄດ້ ຢູ່ເຂດບ້ານຫາດຊາຍຄູນ ເມືອງໂຂງ ແຂວງຈໍາປາສັກ, ຊຶ່ງເປັນລົດເປົ້າໝາຍຄ້າຢາເສບຕິດ ລາຍໃຫ່ຍ ແລະ ສາມາດຈັບ ຜູ້ຖືກຫາກ່ຽວກັບຢາເສບຕິດໄດ້ 3 ຄົນ ພ້ອມຢຶດຢາໄອສ໌ 60 ກິໂລ ແລະ ຢາບ້າ 48.000 ເມັດ.
ຜູ້ຖືກຫາທັງ 3 ຄົນ ຊື່ ທ້າວ ສີວອນ ອາຍຸ 36 ປີ ຢູ່ ບ້ານນາຫ້ວຍ ເມືອງຊໍາເໝືອ ແຂວງຫົວພັນ ໄດ້ມາພັກເຊົາຢູ່ບ້ານໜອງວຽງຄໍາ ເມືອງໄຊທານີ ນະຄອນຫລວງວຽງຈັນ ພົບເຄື່ອງຕິດຕົວປະກອບມີເງິນ 700.000 ກີບ, 36.000 ບາດ. ທ້າວ ກອງມະນີ ອາຍຸ 36 ປີ ຢູ່ບ້ານນໍ້າປຸນ ເມືອງແກ້ວອຸດົມ ແຂວງວຽງຈັນ ເປັນເຈົ້າຂອງລົດຟໍຈຸນເນີ, ພົບຂອງຕິດ ຕົວລູກປືນເສິກ 6 ລູກ, ໂທລະສັບ 3 ໜ່ວຍ, ວັດຖຸຄ້າຍຄືຄໍາສາຍແຂນ 1 ເສັ້ນ, ແຫວນ 1 ວົງ, ພຣະ 5 ອົງ, ປັກແຂນ 1 ເສັ້ນ, ສາຍຄໍສີດໍາພ້ອມພຣະ 1 ເສັ້ນ. ທ້າວໂພໄຊ ອາຍຸ 36 ປີ ຢູ່ບ້ານຫ້ວຍເພັກ ເມືອງໂພນທອງ ແຂວງຈໍາປາສັກ ພົບຂອງຕິດຕົວ ມີສາຍແຂນ 1 ອັນ, ແຫວນຄ້າຍຄືຄໍາ 1 ວົງ ແລະ ເງິນ 7.000 ບາດ.
ປັດຈຸບັນນີ້ເຈົ້າໜ້າທີ່ ປກສ ແຂວງຈໍາປາສັກເລັ່ງສອບສວນ-ສືນສວນ ຫາທີ່ໄປທີ່ມາ ຂອງ ຢາເສບຕິດດັ່ງກ່າວ ແລະ ຊອກຫາຜູ້ຮ່ວມຂະບວນການ.
ຂ່າວ: ວຽງຈັນທາຍ
ຂໍ້ມູນ-ພາບ: ປກສ
