ເປີດໂຕຮູບເງົາສະຫຍອງຂວັນເລື່ອງໃໝ່ຫຼ້າສຸດ “ກ່ອງກອຍ” ເຊິ່ງໄດ້ເປີດໂຕໃນວັນທີ 11 ກໍລະກົດ 2026 ທີ່ ໂຮງສາຍຮູບເງົາ ເມ, ຮູບເງົາດັ່ງກ່າວ ເປັນຜົນງານຮ່ວມທຶນ ລະຫວ່າງ ລາວ ແລະ ໄທ ໂດຍມີກຳນົດການເປີດສາຍຢ່າງເປັນທາງການພ້ອມກັນໃນທັງສອງປະເທດ ໃນວັນທີ 16 ກໍລະກົດ 2026 ນີ້.
ຮູບເງົາເລື່ອງ “ກ່ອງກ່ອຍ” ເປັນຜົນງານການກຳກັບຮູບເງົາເລື່ອງຍາວ ເລື່ອງ ທີ່4 ຂອງຜູ້ກຳກັບສີມືດີຂອງລາວຄື ທ່ານ ອາດີສັກ ແກ້ວລາ ຜູ້ອຳນວຍການບໍລິສັດລາວນິວເວບຊີນີມາ (ເຈົ້າຂອງຜົນງານຮູບເງົາເລື່ອງ ປາຍທາງ ນ້ອຍ ແລະ ໄຂ່ຂວັນ) ພາຍໃຕ້ການຮ່ວມມື ແລະ ເຊັນບົດບັນທຶກຄວາມເຂົ້າໃຈ (MOU) ຮ່ວມກັບ ບໍລິສັດ ນະພາ ມີເດຍ ໃນຖານະຜູ້ຈັດຈຳໜ່າຍ.
ຜູ້ກຳກັບຮູບເງົາ ທ່ານ ອາດີສັກ ແກ້ວລາ ໄດ້ເປີດເຜີຍເຖິງແຮງບັນດານໃຈໃນການສ້າງວ່າ ໂຄງການນີ້ເກີດຂຶ້ນເພື່ອແກ້ໂຈດດ້ານການຕະຫຼາດຂອງຮູບເງົາລາວ ຫາກສາຍສະເພາະພາຍໃນປະເທດ ແມ່ນມີໂອກາດເທົ່າທຶນ ແລະ ໄດ້ກຳໄລຄືນມາໄດ້ຍາກ ດັ່ງນັ້ນ ຈຶ່ງໄດ້ເລືອກເອົາ “ຮູບເງົາຜີ” ມາເປັນແກນຫຼັກ ເນື່ອງຈາກປະເທດໃນຂົງເຂດອາຊຽນ ມີຮາກຖານວັດທະນະທຳ ແລະ ຄວາມເຊື່ອເລື່ອງຜີທີ່ໃກ້ຄຽງກັນ ຊຶ່ງຈະຊ່ວຍໃຫ້ເຂົ້າເຖິງຕະຫຼາດຕ່າງປະເທດໄດ້ງ່າຍກວ່າຮູບເງົາປະເພດຕະຫຼົກ ຫຼື ແນວອື່ນໆ ທີ່ມີຂໍ້ຈຳກັດດ້ານພາສາ ແລະ ທາງວັດທະນະທຳ.
ບົດເລື່ອງຮູບເງົາເລື່ອງນີ້ ໄດ້ຮັບການຮີບໂຮມຂໍ້ມູນ ແລະ ສຶກສາຢ່າງເລິກເຊິ່ງຈາກແຫຼ່ງວັນນະຄະດີລາວ ແລະ ນິທານພື້ນບ້ານກ່ຽວກັບ “ກ່ອງກ່ອຍ” ເຖິງຢ່າງໃດກໍດີ ຜູ້ກຳກັບໄດ້ເນັ້ນວ່າ ເຖິງແມ່ນຈະໃຊ້ “ຜີກ່ອງກ່ອຍ” ເປັນຈຸດຂາຍເພື່ອດຶງດູດຜູ້ຊົມ ແຕ່ເນື້ອແທ້ຂອງຮູບເງົາແມ່ນການສະທ້ອນເຖິງບັນຫາ ແລະ ຄວາມເປັນມະນຸດ ທີ່ບໍ່ວ່າຈະເປັນຄົນຊົນຊາດໃດກໍສາມາດເຂົ້າເຖິງ ແລະ ຮູ້ສຶກຮ່ວມໄດ້.
ຄວາມໂດດເດັ່ນຂອງຮູບເງົາເລື່ອງນີ້ ແມ່ນການນຳໃຊ້ບຸກຄະລາກອນ ແລະ ທີມງານຝັ່ງລາວສູງເຖິງ 90% ບໍ່ວ່າຈະເປັນນັກສະແດງຫຼັກ ຜູ້ກຳກັບ ແລະ ຜູ້ຊ່ວຍຜູ້ກຳກັບ ໂດຍມີທີມງານຊ່ຽວຊານຈາກປະເທດໄທເຂົ້າມາຊ່ວຍສະໜັບສະໜູນໃນສ່ວນຂອງເຕັກນິກການຖ່າຍທຳ ລະບົບໄຟ ແລະ ກ້ອງ. ນອກຈາກນີ້ ຍັງມີນັກສະແດງທີ່ມີຊື່ສຽງຈາກປະເທດໄທຮ່ວມສະແດງນຳອີກ 2 ທ່ານ ໂດຍຮູບເງົາເລື່ອງນີ້ໄດ້ໃຊ້ເວລາໃນການຖ່າຍທຳຢູ່ ສປປ ລາວ ທັງໝົດເປັນເວລາ 1 ເດືອນ ໃນຊ່ວງເດືອນພຶດສະພາ ຫາ ມິຖຸນາ 2025 ແລະ ໃຊ້ເວລາອີກກວ່າ 1 ປີ ໃນຂັ້ນຕອນການຕັດຕໍ່ ແລະ ຈັດການດ້ານການຕະຫຼາດ.
ໃນຕອນທ້າຍ ຜູ້ກຳກັບໄດ້ສະແດງຄວາມຄາດຫວັງ ໂດຍຮຽກຮ້ອງໃຫ້ມວນຊົນ ແລະ ແຟນຮູບເງົາລາວ ຊ່ວຍກັນສະໜັບສະໜູນຮູບເງົາລາວເລື່ອງນີ້ ເພື່ອຮ່ວມກັນສ້າງສະຖິຕິໃໝ່ໃຫ້ຮູບເງົາລາວສາມາດສ້າງລາຍຮັບເທົ່າທຽມ ຫຼື ລື່ນຮູບເງົາຕ່າງປະເທດ ເພື່ອເປັນການສ້າງຄວາມໝັ້ນໃຈໃຫ້ແກ່ນາຍທຶນ ແລະ ເປີດໂອກາດໃຫ້ແກ່ບຸກຄະລາກອນຮຸ່ນໃໝ່ໃນວົງການຮູບເງົາລາວຕໍ່ໄປໃນອະນາຄົດ.
ຮູບເງົາ “ກ່ອງກ່ອຍ” ຈະເປີດສາຍຢ່າງເປັນທາງການ ພ້ອມກັນທັງໃນ ສປປ ລາວ ແລະ ປະເທດໄທ ນັບຕັ້ງແຕ່ວັນທີ 16 ກໍລະກົດ 2026 ນີ້ເປັນຕົ້ນໄປ ໃນທຸກໆໂຮງຮູບເງົາ.
