ສະພາແຫ່ງຊາດກຽມເປີດກອງປະຊຸມສະໄໝວິສາມັນເທື່ອທີ 1 ຊຸດທີ X ໃນວັນທີ 6-10 ກໍລະກົດ 2026 ເພື່ອເລັ່ງພິຈາລະນາວາລະແຫ່ງຊາດແກ້ໄຂຄວາມທຸກຍາກ ແລະ ຮັບຮອງກົດໝາຍງົບປະມານ-ຄັງເງິນໃໝ່ ເຊິ່ງຈະສົ່ງຜົນໂດຍກົງຕໍ່ສະຖຽນລະພາບທາງການເງິນມະຫາພາກ ແລະ ການຟື້ນຟູເສດຖະກິດຂອງຊາດໃນຕໍ່ໜ້າ.
ໃນວັນທີ 2 ກໍລະກົດ 2026 ທີ່ຜ່ານມາ, ທ່ານ ບຸນຈັນ ສີວົງພັນ ກຳມະການສູນກາງພັກ, ຫົວໜ້າຫ້ອງວ່າການສະພາແຫ່ງຊາດ ໄດ້ຖະແຫຼງຢືນຢັນເຖິງຄວາມພ້ອມໃນການດຳເນີນກອງປະຊຸມເຊິ່ງຈະໃຊ້ເວລາ 5 ວັນເຕັມ ທີ່ຫ້ອງປະຊຸມໃຫຍ່ສະພາແຫ່ງຊາດ.
ໂດຍກອງປະຊຸມຄັ້ງນີ້ ຈະເປັນບ່ອນໃຫ້ລັດຖະບານໄດ້ຂຶ້ນລາຍງານຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານ ແລະ ແຜນເງິນຕາໃນໄລຍະ 6 ເດືອນຕົ້ນປີ 2026 ພ້ອມທັງວາງທິດທາງສຳລັບ 6 ເດືອນທ້າຍປີຢ່າງເປັນຮູບປະທຳ. ຄະນະປະຈຳສະພາແຫ່ງຊາດຍັງຈະໄດ້ປະກອບຄຳເຫັນຢ່າງກົງໄປກົງມາຕໍ່ບົດລາຍງານດັ່ງກ່າວ ເພື່ອຊອກຫາທາງອອກທີ່ດີທີ່ສຸດໃຫ້ແກ່ປະເທດຊາດ.
ຕາມການຖະແຫຼງຂອງທ່ານ ບຸນຈັນ ສີວົງພັນ ຈຸດສຸມທີ່ໜ້າສົນໃຈໃນວາລະກອງປະຊຸມຄັ້ງນີ້ ແມ່ນການພິຈາລະນາຮັບຮອງເອົາວາລະແຫ່ງຊາດວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ເຊິ່ງເປັນຈຸດສຳຄັນໃນການຍົກລະດັບຊີວິດການເປັນຢູ່ຂອງມວນຊົນຮາກຖານ.
ພ້ອມດຽວກັນນັ້ນ, ຍັງຈະມີການພິຈາລະນາຮັບຮອງຮ່າງກົດໝາຍວ່າດ້ວຍຄັງເງິນແຫ່ງລັດທີ່ສ້າງຂຶ້ນໃໝ່ ແລະ ຮ່າງກົດໝາຍວ່າດ້ວຍງົບປະມານແຫ່ງລັດສະບັບປັບປຸງ ເພື່ອຮັບປະກັນການຄຸ້ມຄອງລາຍຮັບ-ລາຍຈ່າຍໃຫ້ມີຄວາມຮັດກຸມ ແລະ ໂປ່ງໃສຍິ່ງຂຶ້ນ.
ໂດຍກອງປະຊຸມຄາດວ່າຈະມີການອອກມະຕິຮັບຮອງເຖິງ 4 ສະບັບ ຄື ມະຕິຮັບຮອງເອົາບົດລາຍງານຂອງລັດຖະບານ ວ່າດ້ວຍການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2026 ແລະ ທິດທາງແຜນການ 6 ເດືອນທ້າຍປີ 2026; ມະຕິຮັບຮອງເອົາວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ; ມະຕິຮັບຮອງເອົາກົດໝາຍວ່າດ້ວຍ ຄັງເງິນແຫ່ງລັດ; ມະຕິຮັບຮອງເອົາກົດໝາຍວ່າດ້ວຍງົບປະມານແຫ່ງລັດ.
ເພື່ອຮັບປະກັນການມີສ່ວນຮ່ວມຂອງທຸກພາກສ່ວນ, ຕາງໜ້າຄະນະປະຈໍາສະພາແຫ່ງຊາດ ໄດ້ຮຽກຮ້ອງມາຍັງພະນັກງານລັດ, ທະຫານ, ຕຳຫຼວດ, ນັກຮຽນ-ນັກສຶກສາ, ປັນຍາຊົນ, ກຳມະກອນ ຕະຫຼອດຮອດປະຊາຊົນລາວທຸກຊັ້ນຄົນທັງພາຍໃນ ແລະ ຕ່າງປະເທດ ຈົ່ງຮ່ວມກັນຕິດຕາມການດໍາເນີນກອງປະຊຸມຄັ້ງນີ້. ປະຊາຊົນຍັງສາມາດປະກອບຄຳຄິດຄຳເຫັນ ຫຼື ສົ່ງຂໍ້ສະເໜີຕ່າງໆໂດຍກົງຫາທີມງານສະພາແຫ່ງຊາດ ຜ່ານສາຍດ່ວນ 156, ອີເມວ nalao.156@gmail.com ແລະ ແອັບພລິເຄຊັນ Laona ໄດ້ຕັ້ງແຕ່ວັນທີ 3 ເຖິງ 10 ກໍລະກົດ 2026 ໃນໂມງລັດຖະການ.
